एजेन्सी । इजरायलसँगको लडाइँ तीव्र बन्दै गर्दा इरानले सोमबार दिउँसै ठूलो आक्रमण गरेको छ ।
इजरायलका पूर्व न्यायमन्त्री योसी बेलिनले सोमबार दिउँसै आक्रमण भएको बताएका छन् । उनले यसलाई १३ जुनबाट सुरु भएको लडाइँको अहिलेसम्मकै सबैभन्दा लामो आक्रमणका रुपमा व्याख्या गरेका छन् ।
तेलअभिभबाट अल जजिरासँग कुरा गर्दै बेलिनले भने, ‘यो आक्रमणमा कुनै मानवीय क्षति भएन, तर केही भौतिक क्षति पुगेको छ, जसको विवरण अझै स्पष्ट भइसकेको छैन।’
उनका अनुसार यसरी इरानले दिउँसै एकदमै दुर्लभ आक्रमण गरेको हो । उनले सामान्यतया यस्तो आक्रमण रातिको समयमा हुने पनि बताएका छन् ।
बेलिनले इजरायलले इरानको हतियारको ठूलो हिस्सा नष्ट गरे पनि इरानी सेनासँग अझै पनि प्रशस्त मिसाइल र ड्रोनहरू बाँकी रहेको बताए।
उनका अनुसार इजरायली सेनाले इरानका धेरै ड्रोनहरू निष्क्रिय गर्न सफल भएको छ । तर उनीहरूसँग अझै पनि दैनिक प्रयोग गर्न सक्ने पर्याप्त संख्यामा हतियार रहेको कुराले इजरायललाई चिन्तित बनाएको छ ।
इरानी मिसाइल आक्रमणले इजरायलको दक्षिणी क्षेत्रहरूमा विद्युत् आपूर्ति अवरुद्ध भएको छ । द टाइम्स अफ इजरायलका अनुसार, इजरायल इलेक्ट्रिक कर्पोरेशनले एक ‘रणनीतिक पूर्वाधार संरचना’ नजिकै मिसाइल आक्रमण भएको पुष्टि गरेको छ। उक्त क्षेत्रका केही सहरहरूमा अहिले विद्युत् आपूर्ति अवरुद्ध भएको छ ।
‘विद्युत् आपूर्ति यथासक्य चाँडो पुन:स्थापना गर्ने उद्देश्यले प्राविधिक टोलीहरू विभिन्न स्थानतर्फ जाँदै छन्’, समाचारमा भनिएको छ, ‘पूर्वाधार मर्मत तथा सुरक्षा जोखिम हटाउने कार्य सुरक्षा निकायसँगको समन्वयमा भइरहेका छन्।’
आक्रमणको समयमा करिब ३५ मिनेटसम्म साइरन बजेको थियो। च्यानल १३ का अनुसार युद्ध सुरु भएदेखि इजरायलीहरूले यो अहिलेसम्मको सबैभन्दा लामो समय सेल्टरमा बिताएका हुन्।
