विराटनगर । मोरङको विराटनगर महानगरपालिका-४ बरगाछीस्थित हेरिटेज इन्टरनेसनल स्कुलले आफ्ना विद्यार्थीहरूलाई एकदिने पब्लिक स्पिकिङ र मास्टर अफ सेरेमनिज (एमसी) तालसम दिएको छ ।
बिहीबार स्कुलको सभाहलमा आयोजित तालिममा विराटनगरका पत्रकार सन्तोष सिग्देलले सहजीकरण गरेका थिए ।
हेरिटेजमै कक्षा ३ मा अध्ययन गर्ने सार्थक र कक्षा १ का साश्वता सिग्देलका अभिभावकसमेत रहेका सिग्देलले तालिममा स-साना विद्यार्थीहरूलाई कार्यक्रम सञ्चालनदेखि स्टेज कार्यक्रमसम्बन्धी विषयमा प्रयोगात्मक अभ्यास गराएका थिए ।
सभा-समारोहमा कसरी बोल्ने र प्रस्तुत हुने भन्ने विषयमा विद्यार्थीहरूलाई ज्ञान प्रदान गरिएको उक्त तालिमबाट छात्र-छात्र अभिप्रेरित भएको स्कुलका प्रिन्सिपल सुशान्त बानियाँले बताए ।
विद्यार्थीका आन्तरिक प्रतिभा प्रष्फुटनका लागि यस किसिमका विभिन्न तालिम आयोजना गर्दै आइरहेको र गर्दैजाने उनको भनाइ छ ।
विराटनगरको उत्कृष्ट विद्यालयमध्येको एक हेरिटेजले पठनपाठनका अलाबा विभिन्नखाले अतिरिक्त क्रियाकलापहरू गराइरहेको छ ।
बिहीबार नै स्कुलले कक्षा १ देखि ३ सम्मका विद्यार्थीहरूलाई सहभागी गराएर जुनियर स्विमिङ प्रतियोगिताको आयोजना गरेको थियो । त्यसअघि बुधबार स्कुलले कक्षा ४ देखि ७ सम्मका विद्यार्थीहरूको फ्रिस्टाइल ५० मिटर स्विमिङ प्रतियोगिताको आयोजना गरेको थियो ।
त्यसभन्दा अगाडि भने हेरिटेजले कक्षा ४ देखि १० कक्षासम्मका विद्यार्थीहरूलाई महिनावारी, महिनावारीको समयमा हुने शारीरिक र भावनात्मक परिवर्तनहरू, महिनावारीको समयमा हुने गलत अभ्यासलगायत विषयमा सचेत गराएको थियो ।
विराटनगर नर्सिङ क्याम्पसकी सहायक प्राध्यापक पुनम मण्डलले सहजकर्ताको भूमिका निभाएकी उक्त कार्यक्रममा महिनावारीका विषयमा विद्यार्थीहरूका लागि सचेतनामुलक ‘सेसन’ चलाइएको थियो ।
