विराटनगर । कोशी प्रदेशकै ठुलो फुटबल प्रतियोगिता विराट गोल्डकपको आठौं संस्करण चैत १५ देखि सञ्चालन हुने भएको छ ।
विराट गोल्डकप ट्रस्टको आयोजनामा हुने गोल्डकप चैत १५ गतेदेखि २४ गतेसम्म हुने बताइएको छ ।
ट्रस्टका अध्यक्ष किशोर शाहीका अनुसार १० टोली सहभागी गराउनेगरी प्रतियोगिताको तयारी भए पनि सहभागी हुने टिमको छिनोफानो भइसकेको छैन ।
विराटनगरस्थित सहिद रंगशालामा आयोजना हुने प्रतियोगिताको पुरस्कार राशि भने झन्डै आधाले घटाइएको छ ।
सातौं संस्करणको विजेता टिमले २० लाख ५१ हजार र उपविजेताले १० लाख ५१ हजार रुपैयाँ पुरस्कार पाएका थिए ।
भारत केरलाको लुका सकरलाई हराउँदै घरेलु टोली विराटनगर सिटी एफसीले उपाधि जितेको थियो ।
त्यसभन्दा अघिल्लो संस्करणका विजेताले १५ लाख १५ हजार पुरस्कार पाएको थियो भने पाँचौं संस्करण विजेताले १३ लाख रुपैयाँ नगद पुरस्कार पाएको थियो ।
अब, यो वर्ष भने विजेताले ११ लाख र उपविजेताले ५ लाख रुपैयाँ प्राप्त गर्नेछन् ।
गत वर्ष गोल्डकप आयोजना गर्दा धेरै घाटा लागेका कारण यो वर्ष पुरस्कारको राशि घटाउन बाध्य भएको बताइएको छ ।
आर्थिक मन्दी र गत वर्ष घाटा भएका कारण यो वर्ष पुरस्कारको राशि घटाइएको आयोजकले जनाएको छ ।
अघिल्लो संस्करणझैं यसपालि पनि प्रतियोगिताका खेलहरू राति खेल हुने छन् । त्यसका लागि सहिद रंगशालामा फ्लड लाइट जोडिएकै छ ।
२०१८ सालदेखि तत्कालीन राजा महेन्द्र शाहको नामबाट महेन्द्र गोल्डकपको रूपमा यसको सुरुआत भएको इतिहास छ ।
३९ वर्षसम्म नियमित रूपमा भइरहेको प्रतियोगिता २०५७ सालदेखि भने ११ वर्षसम्म गोल्ड कप हुनै सकेन ।
त्यसपछि नाम परिवर्तन गर्दै विराट गोल्डकप बनाएर २०६८ सालदेखि प्रतियोगिता सञ्चालन गर्न थालिएको हो ।
२०७० सालमा हुन नसकेको यो प्रतियोगिता आयोजक परिवर्तन गरेर २०७१ बाट गर्न थालिएको हो ।
ऐतिहासिक विराट गोल्डकपले विभिन्न उद्योगीको साथ-सहयोगमा निरन्तरता पाउँदै आएको छ ।
