विराटनगर । क्यान्सर रोगका बिरामीको विशिष्टिकृत उपचार गर्ने उद्देश्यका साथ मोरङको बूढीगंगामा विराट क्यान्सर इन्स्टिच्युट सञ्चालनमा आएको छ ।
विश्व क्यान्सर दिवसको अवसर पारेर आइतबार अस्पताल उद्घाटन गरिएको हो ।
सबै प्रकारका क्यान्सर रोगको उपचार एकै ठाउँमा हुनेगरी बूढीगंगा-२ टंकीसिनवारीमा रहेको विराट मेडिकल कलेज शिक्षण अस्पतालले १०० शय्याको विराट क्यान्सर इन्स्टिच्युट सञ्चालनमा ल्याएको हो ।
नेपाली कांग्रेसका नेता डा. शेखर कोइरालाले अस्पतालको उद्घाटन गरेका हुन् ।
विराट शिक्षण अस्पतालका अध्यक्ष डा. ज्ञानेन्द्रमान सिंह कार्कीका मातापिता रेवन्त–रुक्मिणीको स्मृतिमा अस्पताल सञ्चालनमा ल्याइएको हो ।
अस्पताल सञ्चालनमा आएपछि यसले देशैभरिका क्यान्सर पीडित बिरामीको विशिष्टिकृत उपचारमा उल्लेखनीय भूमिका निर्वाह गर्ने बताइएको छ ।
विराट क्यान्सर इन्स्टिच्युटको स्थापनाले बिरामीहरू उपचारका लागि देशबाहिर जानुपर्ने अवस्था अन्त्य भएको अस्पतालले जनाएको छ ।
समयमै रोगको अवस्था पहिचान गरिए धेरै प्रकारका क्यान्सर रोगको उपचार नेपालमै सम्भव रहेको अस्पतालका अध्यक्ष डा. ज्ञानेन्द्रमान सिंह कार्कीले बताए ।
विराट मेडिकल कलेजका १२ सय शय्यामध्ये १०० शय्या क्यान्सर रोग विभागको लागि छुटयाएको कार्कीले जानकारी दिए ।
चार सय करोड रुपैयाँको लगानीमा अस्पताल परिसरभित्रै क्यान्सर रोगको उपचारको लागि इन्स्टिच्युट सञ्चालनमा ल्याएको उनको भनाइ छ ।
अस्पतालको उद्घाटन कार्यक्रममा बोल्दै कांग्रेस नेता कोइरालाले क्यान्सर रोगका बिरामीलाई उपचारका लागि सरकारले दिने एक लाखको आर्थिक सहयोग पिनटमात्र भएको बताए ।
उनले क्यान्सर रोगको उपचारका निम्त्ति सरकारले बीमा कार्यक्रमलाई प्रभावकारी बनाएर लैजानुपर्ने विषयमा जोड दिए ।
कार्यक्रममा हास्य कलाकार मदनकृष्ण श्रेष्ठको समेत सहभागिता रहेको थियो ।
कार्यक्रममा बोल्दै उनले क्यान्सर रोगबाट हुने मृत्युदर घटाउन जनचेतना आवश्यक रहेको बताए । उनले क्यान्सर हुँदा बिरामीले निकै पीडा भोग्नुपर्ने अनुभवसमेत सुनाए ।
विश्व क्यान्सर दिवसको अवसर पारेर आइतबार रेवन्त रुक्मिणी मेमोरियल विराट क्यान्सर इन्स्टिच्युटले ‘आशा–क्लोज द केयर ग्याप’ नामक जनचेतनामूलक कार्यक्रम समेत सम्पन्न गरेको छ ।
