झापा । घुँडा सुन्निएर अस्पताल पुगेकी महिलाको मृत्यु भएपछि अस्पतालमा तनावको स्थिति सिर्जना भएको छ ।
बिर्तामोड नगरपालिका-९ की ३५ वर्षीया नर्वदा बाँस्कोटालाई सोमबार बिहान मनमोहन अस्पतालमा उपचार गर्न लगिएको थियो ।
घुँडामुनि सुन्निएको समस्या लिएर झापाको बिर्तामोडस्थित मनमोहन अस्पताल पुगेकी उनको उपचारका क्रममा मृत्यु भएको हो ।
उपचारमा भएको लापरवाहीले उनको मृत्यु भएको भन्दै आफन्तहरू क्षतिपूर्ति र स्वास्थ्यकर्मीलाई कारबाहीसहित प्रदर्शनमा उत्रेका छन् ।
अस्पतालको लापरवाहीले बिरामीको मृत्यु भएको भन्दै मृतक परिवार र आफन्तले अस्पताल घेराउ गर्दै तोडफोड गर्न खोजेपछि तनाव भएको हो ।
मृतकका छोराछोरीको पालनपोषण, शिक्षादिक्षाका लागि क्षतिपूर्ति र लापरवाही गर्ने स्वास्थ्यकर्मीलाई कारबाही गर्नुपर्ने आफूहरूको माग रहेको मृतकका भाइ दिनेश बाँस्कोटाले बताए ।
इमरजेन्सीमा भर्ना भएको बिरामीको दिनभर राख्दासमेत कुनै पनि रिपोर्ट नदिएको र उपचार नगरेको आरोप आफन्तले लगाएका छन् ।
उपचारका क्रममा सोमबार बिहान ल्याइएकी महिलाको साँझ मृत्यु भएको अस्पताल व्यवस्थापनले जनाएको छ ।
घटनाका विषयमा छलफल भइरहेको अस्पताल प्रशासनले जनाएको छ ।
मृतकको शव अस्पतालको आइसियूमा रहेको जनाइएको छ ।
अस्पताल प्रवेशमा रोक लगाइएको छ ।
प्रहरीले सोमबार बेलुकादेखि नै अस्पताल परिसरमा सुरक्षा कडा बनाएको छ ।
