प्रदेश १ का दुई जना प्रदेशसभा सदस्यहरूले आइतबार पदबाट राजीनामा दिएका छन् ।
नेकपा (एमाले) बाट निर्वाचित प्रदेशसभा सदस्यहरुले स्थानीय तह निर्वाचनमा उम्मेदवार बन्न सांसद पदबाट राजीनामा दिएका हुन् ।
झापाको निर्वाचन क्षेत्र नम्बर १ (२) बाट निर्वाचित भएका गोपाल बुढाथोकी र इलामको निर्वाचन क्षेत्र नम्बर १ (२) बाट निर्वाचित सांसद काजीमान कागतेले प्रदेशसभा सदस्यबाट राजीनामा दिएका हुन् ।
दुवैको राजीनामा स्वीकृत भइसकेको प्रदेशसभा सचिव गोपाल पराजुलीले जानकारी दिएका छन् । एमालेले झापाको मेचीनगर नगरपालिकाको प्रमुख पदमा उम्मेदवार बनाउने निर्णय गरेपछि बुढाथोकीले पदबाट राजीनामा गरेका हुन् ।
२०७४ सालको स्थानीय तह निर्वाचनमा पनि बुढाथोकीले नगरपालिका प्रमुख पदमा दाबी गरेका थिए तर एमालेले त्यसबेला उनलाई उम्मेदवार बनाएको थिएन ।
त्यसबेला स्थानीय तहमा टिकट नपाएपछि पार्टीले उनलाई प्रदेशसभामा पठाउने निर्णय गरेको थियो । यस्तै, इलामका सांसद काजीमान कागतेले सूर्योदय नगरपालिकाको प्रमुख पदमा उम्मेदवारी दिने भएका छन् ।
कागते नेकपा एकीकृत समाजवादी पार्टीका वरिष्ठ नेता झलनाथ खनालको निर्वाचन क्षेत्रबाट सांसद निर्वाचित भएका थिए ।
