नेपाली कांग्रेसका सभापति गगनकुमार थापाले पार्टीका नेताको व्यक्तिगत आचरण र कमजोरीको जिम्मेवारी सिंगो पार्टीले लिन नहुने बताएका छन्। नेताको व्यक्तिगत जीवनमा कमजोरी देखिए त्यसको जवाफदेहिता सम्बन्धित व्यक्तिले नै वहन गर्नुपर्ने उनको भनाइ छ।
दसैँ, तिहार तथा छठ पर्वको अवसरमा आयोजित शुभकामना आदानप्रदान कार्यक्रममा बोल्दै थापाले नेपाली कांग्रेस कुनै व्यक्तिको निजी कम्पनी नभई लाखौँ सदस्य, समर्थक र शुभेच्छुकको साझा संस्था भएको बताए।
आफ्नो व्यक्तिगत आचरणमा कमजोरी भए त्यसको जिम्मेवारी आफूले नै लिनुपर्ने उल्लेख गर्दै उनले त्यसको भार पार्टीमाथि थोपर्न नहुने धारणा राखे। नेतृत्वको बचाउ गर्नु भनेको नेताका सबै कमजोरीको समर्थन गर्नु नभई उसले निर्वाह गरेको जिम्मेवारी र कामको मूल्याङ्कन गर्नु भएको पनि उनले स्पष्ट पारे।
पार्टीभित्र रहेका कमजोरी सुधार गर्दै कांग्रेसलाई जनताको अपेक्षाअनुसार अघि बढाउने प्रयास गरिने थापाले बताए। कांग्रेसको १५औँ महाधिवेशनबाट नेतृत्व चयन प्रक्रिया अन्तिम चरणमा पुगिरहेका बेला उनले आन्तरिक प्रतिस्पर्धामा पराजित भएका नेताहरूलाई पनि पार्टीमा समेटेर अघि बढाउने प्रतिबद्धता जनाए।
निर्वाचनमा जित हासिल गर्नेहरू मात्रै योग्य र पराजित हुनेहरू अयोग्य नहुने बताउँदै उनले आफूले काम गर्न चाहेका कतिपय योग्य नेतासमेत प्रतिस्पर्धामा छुटेको उल्लेख गरे। जित्ने र हार्ने दुवै पक्षलाई समेटेर पार्टीलाई अघि बढाउने उनको भनाइ छ।
थापाले यसपटकको महाधिवेशनमा कांग्रेसभित्र लामो समयदेखि प्रभावशाली रहेका दुई समूह वा गुटको प्रभाव कमजोर भएको पनि बताए। साथै, पार्टीको निर्वाचन प्रणालीमा सुधार गर्दै प्रविधिको प्रयोगमार्फत सबै सदस्यले सभापति चयन गर्न सक्ने व्यवस्था गर्नुपर्ने आवश्यकता औँल्याए।
पार्टीको काम गर्ने शैली र संगठन सञ्चालन गर्ने तरिका बदल्नुपर्नेमा जोड दिँदै थापाले नियमित संगठनात्मक काम पदाधिकारी र केन्द्रीय समितिका जिम्मेवार नेताहरूले अघि बढाउने बताए। आफू भने जनताका कुरा सुन्न र उनीहरूका समस्या बुझ्न देशभर पुग्ने योजनामा रहेको उनले जानकारी दिए।
पार्टीका नेताहरू आफ्नै बैठक र छलफलमा सीमित हुन नहुने भन्दै थापाले समाजमा पुगेर नागरिकका समस्या सुन्ने र समाधान खोज्ने कामलाई प्राथमिकता दिनुपर्ने धारणा राखे।
