दाङ तुलसीपुर–३ रानागाउँका ऋषिराम परियारले लगातार ६२ दिन उल्टो हिँडेर मेची–महाकाली यात्रा पूरा गरेका छन् ।
माघ १५ गते पूर्व झापाको मेची पुलबाट यात्रा सुरु गरेका परियारले बिहीबार दिउँसो पश्चिम महाकालीको गड्डाचौकीमा पुगेर उल्टो पैदलयात्रा पूरा गरेका हुन् ।
नेपाललाई अन्र्तराष्ट्रियस्तरमा चिनाउने उद्देश्यका साथ यात्रा सुरु गरेका ऋषिले दुई महिना दुई दिन लगातार उल्टो हिँडेर मेची–महाकालीसम्मको एक हजार २४ किलोमिटर दुरी छिचोलेका हुन् ।
गड्डाचौकी पुगेपछि उनले सबैबाट राम्रो साथ र सहयोग पाएको कारण गन्तव्यमा पुग्न आफू सफल भएको बताए ।
यस्तै, उनले आफनो यात्रामा सहयोग गर्ने आम नागरिक, सुरक्षाकर्मी, प्रशासन, सञ्चारकर्मी तथा पत्रकार सबैमा धन्यवाद तथा आभार प्रकट गरे ।
ऋषि यात्रामा एक्लै भएपनि सामाजिक सञ्जालमार्फत उनको अभियानबारे थाहा पाएका स्थानीहरू पनि सँगसँगै हिँडेर साथ दिएका थिए ।
मुख्य राजमार्गको एक छेउ भएर निरन्तर हिँडिरहने ऋषि झोलामा नेपालको राष्ट्रिय झन्डा सिउरिएर हिँडेका थिए ।
स्वस्थ बन्न दैनिक कम्तिमा एक घण्टा अनिवार्य हिँड्नु पर्छ भन्ने स्वास्थ्य सन्देश लिएर विश्व रेकर्ड राख्ने सोचले उल्टो यात्रामा निस्किएका हुन् ।
यसअघिसमेत जम्पिङ्ग जक्सबाट विश्व रेकर्ड राखिसकेका परियार उल्टो यात्रामा समेत गिनिजबुकमा नाम लेखाउने लक्ष्यमा छन् ।
हातले टेकेरसमेत हिँड्न सक्ने क्षमता भएका परियारले २०७३ सालमा दुई हातले टेकेर दुई किलोमिटर यात्रा गरेका थिए ।
विसं २०६५ सालमा एसएलसी उत्तीर्ण गरेपछि भने उनको मनमा फरक ढङ्गका क्रियाकलाप गरेर समाजमा केही शिक्षा दिने मनसाय बनाएका थिए ।
सोहीअनुरूप उनले सन् २०२० को जनवरी ३१ मा जम्पिङ्ग जक्सबाट विश्व रेकर्ड राखेका थिए ।
‘द मोस्ट जम्पिङ्ग जक्स इन वान मिनेट’ को रेकर्ड परियारको नाममा छ ।
परियारले भारतीय नागरिकले एक मिनेटमा सय १६ पटक जम्पिङ्ग जक्स गर्दै बनाएको कीर्तिमान परियारले एक सय २३ पटक गर्दै भङ्ग गरेका थिए ।
नेपालका ‘विश्व रेकर्डधारी’ ऋषिको नाममा थपियो अर्को कीर्तिमान !
