दाङ तुलसीपुर– ३ रानागाउँका ३० वर्षीय ऋषिराम परियार एउटा फरक प्रयासमा जुटेका छन् ।
फरक ढङ्गका क्रियाकलाप गरेर समाजमा केही शिक्षा दिने मनसायका कारण केही समय अघिदेखि पृथक काम गर्न थालेका ऋषि अहिले उल्टो हिँडेर विश्व कीर्तिमान बनाउने प्रयासमा छन् ।
स्वस्थ बन्न दैनिक कम्तिमा एक घण्टा अनिवार्य हिँड्नु पर्छ भन्ने स्वास्थ्य सन्देश लिएर उनले उल्टो यात्रा थालेका हुन् ।
उनी अहिले मेचीदेखि महाकालीसम्मको उल्टो पैदल यात्रामा छन् ।
ऋषिले शनिबारदेखि काँकरभिट्टाको मेची नदि किनारबाट उल्टो पैदल यात्रा थालेका हुन् ।
हाल उनी सुनसरीको लाैकही पुगेका छन् ।
बिहीबार (आज) मात्र उनले १५ किलोमिटरको उल्टो यात्रा गरे ।
उनी आफ्नो यात्राबारे प्रत्येक दिन सामाजिक सञ्जालमा अप्डेट गर्ने गरेका छन् ।
दुई महिनाभित्र महाकाली पुग्ने योजना बनाएका परियारले दैनिक ३० देखि ४० किलोमिटर यात्रा गरिरहेका छन् ।
ऋषिले यसअघिसमेत जम्पिङ्ग जक्सबाट विश्व रेकर्ड राखिसकेका छन् ।
उल्टो यात्रामा समेत गिनिजबुकमा नाम लेखाउने परियारको लक्ष्य छ ।
यी दुई अभियान सफलपछि थप दुई विधामा समेत विश्व रेकर्डको आफू तयारीमा रहेको परियारको भनाइ छ ।
नेपाल र नेपालीलाई विश्वसामु परिचित गराउन आफूले यी सबै काम गरेको परियार बताउँछन् ।
उनी भन्छन्, ‘हिँड्नु जति स्वास्थ्यलाई राम्रो केही छैन । डाक्टर र स्वास्थ्य विशेषज्ञले नछुटाई भन्ने कुरा हो हिँडडुल गर्नुस् ।’
उनी त्यतिकै उल्टो हिँड्दैनन् ।
झोलामा सिउरिएको नेपालको राष्ट्रिय झन्डा फर्फराउँदै हिँड्छन् ।
नेपाली भेषभूषा दौरा सरुवाल, निलो स्टकोट र कालो भादगाउँले टोपीमा सजिएका परियार पूर्व– पश्चिम राजमार्गको एउटा कुनाबाट उल्टो हिँडिरहन्छन् ।
हातले टेकेरसमेत हिँड्न सक्ने क्षमता भएका परियारले २०७३ सालमा दुई हातले टेकेर दुई किलोमिटर यात्रा गरेका थिए ।
विसं २०६५ सालमा एसएलसी उत्तीर्ण गरेपछि भने उनको पृथक काम गरिररहेका छन् ।
यसैले पनि फरक क्रियाकलाप सुरु गरेको परियारले सन् २०२० को जनवरी ३१ मा जम्पिङ्ग जक्सबाट विश्व रेकर्ड राखेका थिए ।
त्यतिबेलाको उपलब्धिबाट नै प्रेरित भएर उल्टो हिँडेर दुई महिनाभित्र मेचीदेखि महाकालीसम्मको यात्रा गर्ने अठोट लिएको उनको भनाइ छ ।
सम्बन्धित समाचार:
