रूस, युक्रेन र अमेरिकाबीच युद्ध अन्त्य गर्ने उद्देश्यसहित मंगलबार र बुधबार संयुक्त अरब इमिरेट्सको अबुधाबीमा नयाँ चरणको त्रिपक्षीय वार्ता हुने भएको छ। यसअघि जनवरी र फेब्रुअरीमा अमेरिकी मध्यस्थतामा भएका छलफलबाट कुनै ठोस सहमति हुन नसकेपछि पुनः वार्ता गर्न लागिएको हो।
अमेरिकी विशेष दूत स्टिभ विटकफका अनुसार यसपटकको छलफलमा युद्धपछिको सुरक्षा व्यवस्था, तनाव कम गर्ने उपाय, मानवीय सहायता र शान्ति स्थापनाका आगामी कदमबारे विचारविमर्श हुनेछ।
युक्रेनी राष्ट्रपति भोलोदिमिर जेलेन्स्कीले भने सुरक्षा प्रत्याभूति, ऊर्जा क्षेत्रमा युद्धविराम, युद्धबन्दी आदानप्रदान र तीन देशका शीर्ष नेताबीच सम्भावित बैठकलाई प्राथमिकतामा राखेका छन्। यद्यपि, युक्रेनी सांसद दाभिड अराखामियाले तत्कालै ठूलो उपलब्धि हासिल हुने अपेक्षा नरहेको बताएका छन्। लामो समयपछि वार्ता पुनः सुरु हुनु नै सकारात्मक पक्ष भएको उनको भनाइ छ।
वार्तामा अमेरिकाका तर्फबाट विशेष दूत विटकफ र राष्ट्रपति डोनाल्ड ट्रम्पका ज्वाइँ जारेड कुस्नर सहभागी हुनेछन्। रूसले राष्ट्रपति भ्लादिमिर पुटिनका सल्लाहकार भ्लादिमिर मेडिन्स्कीको नेतृत्वमा सैन्य तथा गुप्तचर अधिकारीसहितको टोली पठाउने भएको छ। युक्रेनी टोलीको नेतृत्व वैदेशिक गुप्तचर सेवाका प्रमुख रुस्तेम उमेरोभले गर्नेछन्।
यसैबीच, युरोपेली संघ (ईयू) ले पनि वार्तामा आफ्नो चासो देखाएको छ। जेलेन्स्कीले सोमबार युरोपेली आयोगकी अध्यक्ष उर्सुला भोन देर लेयनसँग साझा रणनीतिबारे छलफल गरेका थिए। भोन देर लेयनले युरोप आफ्ना सहयोगीहरूसँगै वार्ता प्रक्रियामा उपस्थित रहने बताएकी छन्।
वार्ताका क्रममा जर्मनी, फ्रान्स, बेलायत र इटालीका उच्च कूटनीतिक तथा सुरक्षा अधिकारीहरूसँग छुट्टै छलफल गर्ने तयारीसमेत छ। नेटोका प्रतिनिधिहरू पनि अबुधाबी पुग्ने बताइएको छ। तर, युरोपेली अधिकारीहरू मुख्य वार्तामा औपचारिक रूपमा सहभागी हुने वा पर्यवेक्षकका रूपमा मात्र रहने भन्ने अझै स्पष्ट भएको छैन।
रूसले भने अबुधाबीको वार्ता युक्रेन, रूस र अमेरिकाबीच मात्र हुने बताएको छ। सुरक्षा विश्लेषकहरूका अनुसार युरोपेली प्रतिनिधिहरूले बढीमा पर्यवेक्षकको भूमिका पाउन सक्छन्। यसअघि जर्मन चान्सलर फ्रेडरिक मर्जले युक्रेनलाई ७० अर्ब युरो सहयोग गर्ने ईयूको प्रतिबद्धता दोहोर्याउँदै युद्ध अन्त्यका लागि पुटिनलाई गम्भीर हुन आग्रह गरेका थिए।
