१२औं संस्करणको इटहरी गोल्डकप आगामी चैत १९ गतेबाट हुने भएको छ ।
आयोजक राष्ट्रिय जागृति क्लबले आइतबार पत्रकार सम्मेलनको आयोजना गर्दै इटहरीमा राष्ट्रिय जागृति क्लबको आयोजनामा चैत १९ गतेदेखि २६ गतेसम्म अन्तर्राष्ट्रिय आमन्त्रण गोल्डकप फुटबल प्रतियोगिता २०७८ सञ्चालन हुने जानकारी दिए ।
आइतबार इटहरीस्थित त्रियुगा होटेलमा पत्रकार सम्मेलन आयोजना गरी प्रतियोगिताबारे जानकारी दिइएको हो ।
प्रतियोगितामा मनाङ मर्स्याङ्दी क्लब काठमाडौँ, नेपाल आर्मी क्लब काठमाडौँ, झापा ११, मोरङ ११, राष्ट्रिय जागृति क्लब इटहरी ९ आयोजक, न्यूरोड टिम काठमाडौँ, एभिनियर फुटबल क्लब क्यामरुन, कन्चनजंगा फुटबल क्लब भारत गरी ८ वटा टिम सहभागी हुने राष्ट्रिय जागृति क्लबका अध्यक्ष वासुदेव श्रेष्ठले जानकारी दिए ।
कुल ५४ लाख १५ हजार रुपैयाँ लागत लाग्ने अनुमान गरिएको प्रतियोगिताको विजेताले ७ लाख र उपविजेताले ३ लाख ५० हजार पुरस्कार पाउने छन् ।
प्रतियोगिता अवधिभर प्रत्येक म्याचमा म्यान अफ् द म्याच छानिने खेलाडीलाई १० हजार रुपैयाँ पुरस्कार प्रदान गरिने आयोजकले जनाएको छ ।
साथै उत्कृष्ट खेलाडीलाई यमाहा फ्यासिनोको स्कुटर तथा उदयमान खेलाडीलाई ४० इन्चको एलइडी टिभी समेत प्रदान गरिने जनाइएको छ ।
प्रतियोगितालाई कन्ट्रोल लुबरिकेन्टले मुख्य प्रायोजन गरेको छ ।
इटहरी नगरपालिकाले प्रतियोगिताको संयोजन गरेको हो ।
यसअघि २०७५ माघ १२ देखि १९ गतेसम्म इटहरी रंगशालामा मदन भण्डारी इटहरी गोल्डकप संचालन भएको थियो ।
प्रतियोगितामा मनाङलाई हराउँदै आर्मीले उपाधि जितेको थियो ।
