धरानस्थित बिपी कोइराला स्वास्थ्य विज्ञान प्रतिष्ठान धरानले स्वास्थ्य बिमा गरेका विमितहरुकाे निःशुल्क उपचार नगर्ने घाेषणा गरेकाे छ ।
प्रतिष्ठानका उपकुलपति डाक्टर ज्ञानेन्द्र गिरीले बुधबार (आज) एक सूचना प्रकाशित गर्दै चैत १५ गतेदेखि बिमितहरूको उपचार नगरिने जानकारी दिएका हुन् ।
विमितहरूको निःशुल्क उपचार गरेबापत सरकारले दिनु पर्ने रकम समयमा नै नदिएकाे कारण प्रतिष्ठान निःशुल्क उपचार नगर्ने घाेषणा गर्न बाध्य भएकाे सूचनामा उल्लेख गरिएकाे छ ।
बिमामार्फत प्रतिष्ठानले गरेको खर्चको भर्पाइ सरकारले समयमै नगरेका कारण प्रतिष्ठानमा आर्थिक कठिनाइ उत्पन्न भएको जनाउँदै बिपी प्रतिष्ठानले अब बिमाबाट उपचार गर्न नसक्ने बताएको हो ।
प्रदेश १ कै सबैभन्दा ठूलो स्वास्थ्य प्रतिष्ठानले सेवा अवरुद्ध गरे प्रदेश १ र मधेस प्रदेशका हजाराैँ नागरिक स्वास्थ्य बिमा सेवामार्फत हुने उपचारबाट वञ्चित हुने निश्चित छ ।
प्रतिष्ठानले हाल दैनिक तीन हजारभन्दा बढी बिरामीले ओपिडी सेवा दिँदै आएको छ ।
नेपाल सरकार स्वास्थ्य बिमा बोर्डबाट बिमा गरेका बिमितहरुलाई प्रतिष्ठानले २०७४ साउनदेखि स्वास्थ्य सेवा उपलब्ध गराउँदै आएको थियो ।
तर, सरकारले उपचार वापतको रकम लामो समयदेखि उपलब्ध नगराएको भन्दै प्रतिष्ठानले चैत १५ देखि विमाबाट उपचार गर्न नसकिने जनाएको हो ।
‘स्वास्थ्य बिमाको कार्यक्रम सञ्चालन गर्दा देखिएका प्राविधिक तथा अन्य समस्याहरुको सहजीकरण गर्न विभिन्न समयमा स्वास्थ्य बिमा बोर्ड लगायत अन्य सरोकारपालाहरुलाई पटकपटक लिखित अनुरोध गर्दा पनि हालसम्म समाधान हुन सकेन,’ उपकुलपति गिरीद्वारा सार्वजनिक गरिएको सूचनामा लेखिएकाे छ ‘यसले प्रतिष्ठान आर्थिक सङ्कटमा परेको छ । शिक्षक तथा कर्मचारीलाई पारिश्रमिक दिन र दैनिक सञ्चालन खर्चमा समेत प्रतिकूल प्रभाव परेको छ ।’
गिरीका अनुसार दिइएकाे समयभित्र खर्च भर्पाइ नभए बिमामार्फत पाइने सबै प्रकारका बहिरंग, आकस्मिक सेवा तथा अन्तरंग सबै विभागमा उपचार बन्द गरिनेछ ।
