सवारी चालक अनुमति पत्र (ड्राइभिङ लाइसेन्स) को अनलाइन आवेदन प्रणाली अनिश्चितकालसम्मका लागि बन्द भएको छ ।
यातायात व्यवस्था विभागले हिजो (फागुन ३० गते) सूचना जारी गर्दै आज (चैत १) बाट अर्को सूचना जारी नभएसम्म लागि नयाँ आवेदन लिन कार्य बन्द गरिएको बताएको छ ।
विभागका निर्देशक लोकनाथ भुसालका अनुसार हालसम्म परेका आवेदनहरुको कारवाही छिटो सक्न नयाँ आवदेन लिन बन्द गरिएको हो ।
‘हालसम्म परेका अनलाइन आवेदनहरुको कारवाही यथाशक्य चाँडो टुङ्ग्याउनुपर्ने भएकाले २०७८ चैत १ गतेदेखि अर्को सूचना प्रकाशन नभएसम्मको लागि सवारी चालक अनुमति पत्रको अनलाइन आवेदन प्रणाली बन्द गरिएको छ’ विभागद्वारा प्रकाशित सूचनामा भनिएको छ, ‘यसबाट सेवाग्राहीमा पर्न जाने असुविधाप्रति हामी क्षमाप्रार्थी छौँ ।’
नयाँ लाइसेन्सका लागि आवेदन दिन कार्य नै स्थगित गरिँदा नयाँ चालकहरु थप मारमा परेका छन् ।
बल्लबल्ल खुल्ने प्रणालीमा अत्यधिक चाप हुँदा ‘सिस्टम डाउन’ भएर आवेदन भर्न नपाउने गुनासो आवेदकहरुले यसअघि गर्दै आएका थिए ।
कोरोना महामारीको कारण देखाउँदै २०७६ चैतमा पहिलोपटक विभागले नयाँ चालक अनुमतिपत्रको आवदेन लिने कार्य रोकेको थियो ।
‘भिजिट मिति’ प्रदान हुने गरी जति पनि फारम भर्न सकिने व्यवस्था विभागले ल्याएपछि आवेदकहरु उत्साहीत भएका थिए ।
तर कोरोना महामारीको दोस्रो लहरको समस्या देखाउँदै विभागले वैशाखमा आवेदन रोकेको थियो ।
त्यसयता गत कार्तिकबाट सुचारु गरिएको प्रणाली आजबाट फेरी स्थगित गरिएको छ ।
‘भिजिट मिति’ लिने गरी आवेदन भर्ने आवेदकहरुको सङ्ख्या अत्यधिक भएको र त्यसकाे व्यवस्थापनलाई प्राथमिकतामा राखिएकाे विभागले जनाएको छ ।
तर आवेदकको सङ्ख्या धेरै भएपनि विभाग र विभागको विभिन्न प्रदेशमा रहेका कार्यलयहरुले त्यसको उचित व्यवस्थापन हुने गरी काम भने गर्न सकिरहेका छैनन् ।
लाइसेन्स कार्यालयहरुले तोकिएको समयमै परीक्षा गर्न सकिरहेका छैनन् ।
