नेपालको धारिलो बलिङसामु निरीह बनेको ओमानले टी२० विश्वकप ग्लोबल क्वालिफायरको पहिलो खेलमा नेपालसँग ३९ रनको हार भोगेको छ ।
ओमानस्थित अल अमरेत क्रिकेट रङ्गशलामा भएको खेलमा खराब ब्याटिङ गर्दै नेपालले एक सय १८ रनको सामान्य लक्ष्य दिएको थियो ।
तर सामान्य लक्ष्य पछ्याएको ओमानले नेपाललाई दबाब दिनै सकेन र नमिठो हार भोग्यो ।
ओमानका लागि सर्वाधिक रन नशिम खुशीले बनाए । १८ बलको सामना गरेका उनले दुई छक्का र एक चौकाको मद्दतमा २४ रन बनाउनुबाहेक अन्य खेलाडीले दोहोरो अङ्कको रन बनाउन नै सकेनन् ।
खुशीबाहेक ओमानले सर्वाधिक रन अतिरिक्त पाएको थियो । तीन वाइट, एक नो बल र आठ लेग बाईमार्फत ओमानले १२ अतिरिक्त रन बनाएको थियो ।
ओमानको पारी ध्वस्त पार्न नेपालका पाँचौँ बलरले आ–आफ्नो नाममा विकेट लेखाए ।
नेपालको तर्फबाट सर्वाधिक विकेट कमल सिंह ऐरीले लिए । ऐरीले तीन विकेट लिँदा कप्तान सन्दिप लामिछाने र दिपेन्द्र सिंह ऐरीको खातामा दुई–दुई विकेट रह्यो ।
तीव्र गतिका बलरद्वय अविनाश बोहरा र जितेन्द्र मुखियाको नाममा एक–एक विकेट रह्यो ।
खेलको पहिलो ओभरको तेस्रो बलमा कश्यप प्रजापतीलाई शुन्य रनमा गुमाएको ओमानले दोस्रो विकेटका रुपमा आयान खानलाई पेभिलियनमा पाएको थियो ।
दोस्रो ओभरको पाँचौँ बलमा खान क्याच आउट भएका थिए ।
नेपालका लागि पहिलो विकेट कमलसिंह ऐरीले लिए । उनले प्रजापतीलाई दिपेन्द्रसिंहमार्फत क्याच आउट गराएका थिए ।
नेपालले दोस्रो सफलता पनि क्याच आउटकै रुपमा पाएको थियो ।
तीव्र गतिका बलर जितेन्द्र मुखियाले खानलाई आशिफ शेखमार्फत क्याच गराएका थिए ।
ओमानको तेस्रो विकेटका रुपमा आक्रमक ब्याटर जतिन्द्र सिंह पेभिलियन फर्किएका थिए । उनलाई दिपेन्द्रसिंह ऐरीले छैटौँ ओभरमा रन आउट गरेका थिए ।
सिंह १८ बलमा नौ रन बनाएर पेभिलियन फर्किएका थिए ।
११औं ओभरमा नशिम खुशीको विकेट लिनबाट विकेटकिपर आशिफ शेख चुकेका थिए । अविनाश बोहराको बलिङमा ठूलो सट खेल्ने प्रयास गर्दा खुशीको बल हावमा निकै बेर उडेको थियो ।
सोही बलको तल रहे पनि विकेटकिपर शेख क्याच लिन चुकेका थिए ।
जीवनदान पाएपछिको पहिलो बलमा खुशीले चौका प्रहार गर्दै आफ्नो खातामा व्यक्तिगत ६ रन बनाए । त्यसपछि निकै आक्रामक रुपमा प्रस्तुत भएका खुशीलाई कप्तान सन्दिप लामिछानेले पेभिलियनको दिशा दिएका थिए ।
तेह्रौँ ओभरको पाँचौ बलमा बोल्ड आउट हुनुअघि दुई छक्का र एक चौकाको मद्दतमा खुशीले २४ रन बनाए ।
नेपालका लागि आठौँ विकेट दिपेन्द्र सिंह ऐरीले दिलाए । खेलको १४औं ओभरमा उनले अमिर कलिमलाई एलबिडब्ल्यूको धरापमा पारे ।
कमल सिंह ऐरीले खेलको १७औं ओभरमा कल्लिमुल्लाहलाई पाँच रनमा नै क्रिज छाड्न बाध्य बनाएपनि ओमानको पारी लगभग ध्वस्त भएको थियो ।
सोही ओभरको अन्तिम बलमा ऐरीले नै बिलाल खानलाई बोल्ड गरेपछि नेपालको जित सुनिश्चित भएको थियो ।
ब्याटिङमा कमजोर देखिए पनि बलिङ र फिल्डिङमा चुस्त देखिएको नेपालले ओमानविरुद्धको दोस्रो इनिङ पूर्ण आफ्नो नियन्त्रणमा लियो र जित सुनिश्चित गर्याे ।
नेपालका लागि सर्वाधिक रन आरिफ शेखले बनाए । ३७ बलको सामना गरेका उनले दुई चौकाको मद्दतमा ३८ रन बनाएर नेपालको इनिङ सम्हालेका थिए ।
आरिफबाहेक कप्तान सन्दिप लामिछाने र लोकेश बमले समान १६, ज्ञानेन्द्र मल्ले १५ र दिपेन्द्रसिंह ऐरीले ११ रन बनाउनुबाहेक अन्य खेलाडीको प्रदर्शन बिर्सनलायक रह्यो ।
नेपालको इनिङलाई सस्तैमा समेट्न ओमानको तर्फबाट खवार अलिले सर्वाधिक तीन विकेट लिए । त्यसबाहेक बिलाल खानले दुई र फयाज बट र जिसन मक्सुदले एक–एक विकेट आफ्नो नाममा लेखाए ।
अब नेपालले आफ्नो दोस्रो खेल शनिबार फिलिपन्सविरुद्ध खेल्नेछ ।
