नेपाली राष्ट्रिय महिला टोलीकी चर्चित फरवार्ड सावित्रा भण्डारी साम्बा आज नेपाल फकिर्न लागेकी छिन् ।
महिला राष्ट्रिय लिग खेल्ने क्रममा घाइते भएकी साम्बा कतारमा उपचार पछि स्वदेश फर्किन लागेकी हुन् ।
कतारस्थित विमानस्थलाको फोटो सामाजिक सञ्जालमा पोस्ट गर्दै साम्बाले ‘माृतभूमि, म फर्किदैछु’ क्याप्सन लेखेकी छिन् ।
२०७७ सालको महिला लिग खेल्ने क्रममा घाइते भएकी साम्बाको दायाँ घुँडामा समस्या देखिएको थियो ।
अखिल नेपाल फुटबल सङ्घ (एन्फां) को पहलमा र कतार फुटबल सङ्घको सहयोगमा उनको उपचार कतारस्थित अस्पेटार अस्पतालमा गरिएको थियो ।
२०७८ असार १२ गते कतार गएकी साम्बा सात महिनापछि स्वदेश फर्किन लागेकी हुन् ।
अस्पेटार अस्पतालमा घुँडाको सफल शल्यक्रियापछि साम्बाले थुप्रै रिकभरी सेसनमा भाग लिएकी थिइन् ।
आइतबारको परिक्षणमा घुँडाको स्थिती सामान्य देखिएपछि चिकित्सकले साम्बालाई नेपाल फर्कन स्वीकृति दिएका थिए ।
आज नेपाल आइपुग्ने साम्बाले केही साता मैदानमा अभ्यास गर्नेछिन् ।
केही साता एक्लै अभ्यासपछि मात्रै उनी राष्ट्रिय महिला टोलीको सामूहिक प्रशिक्षणमा सहभागी हुनेछिन् ।
