नेपाल एपिएफ क्लबले मनाङविरुद्ध पहिलो हाफमा १–० को अग्रता लिएको छ ।
२०औं संस्करणको आहा रारा गोल्डकपको फाइनलमा आज पोखरा रङ्गशालामा मनाङ र एपिएफ उपाधिका लागि भिड्दै छन् ।
एपिएफका लागि युवराज खड्काले गोल गर्दै सुरुवाती अग्रता दिलाएका थिए ।
सुरुवाती मिनेटबाटै मनाङ र एपिएफले एकअर्काको पोस्टमा धावना बोल्न सुरू गरेका थिए ।
पाँचौँ मिनेटमा विकी तामाङलाई फाउल गरेपछि मनाङका शिव तामाङले पहेँलो कार्ड पाएका थिए । सोही अवसरमा एपिएफले फ्रिकिक पाए पनि गोल गर्न असफल रह्यो ।
एपिएफका कप्तान नविन लामाले गरेको क्रसमा अर्मान्ड विडोम कनेक्ट हुन सफल भएपनि उनकाे हेडले मनाङको पोस्टको दिशा लिन सकेन ।
नवौं मिनेटमा मनाङका ओलावालेले आडेलाजा सोमिडेका लागि एपिएफको पेनाल्टी क्षेत्रभित्र थ्रु बल निकालिदिए पनि सो अवसरमा मनाङ गोल गर्न असफल रह्यो ।
खेलकाे २०औं मिनेटमा युवराज खड्काले गोल गर्दै एपिएफले सुरुवाती अग्रता दिलाउन सफल भए ।
मनाङका प्रवेश कुँवरसँग एपिएफका रवि थिङ बल खोस्न पुगेपछि बल डिफ्लेक्ट भएको थियो । सोही बललाई एपिएफका अर्मान्ड विडोमले नियन्त्रणमा लिँदै गोलका लागि मुभ सुरू गरेका थिए ।
विडोमले राइट फ्ल्याङ्कमा रहेका युवराज खड्काका लागि बल निकालिदिएका थिए । सोही बललाई मनाङको फाइनल थर्डभित्र पुर्याउँदै खड्काले सुन्दर गोल गर्न सफल भए ।
४४औं मिनेटमा मनाङका ओलावलेले प्रयास गरे पनि उनी अफसाइड रहँदै गोल गर्न विफल बनेसँगै मनाङ पहिलाे हाफअघि बराबरी गोल गर्न असफल बन्यो ।
मछिन्द्रलाई ३–१ ले पाखा लगाउँदै एपिएफ र त्रिभुवन आर्मीलाई पेनाल्टी सुटआउटमा ४–३ ले स्तब्ध बनाउँदै मनाङ आहा रारा गोल्डकपको फाइनलमा स्थान बनाउन सफल भएको थियाे ।
आजको खेलको विजेताले ट्रफीसहित दश लाख एक हजार र उपविजेताले पाँच लाख एक हजार नगद पुरस्कार प्राप्त गर्नेछन् ।
