नौ खेलाडीमा सीमित कापे भेर्डेलाई हराउँदै सेनेगल ३३औँ संस्करणको अफ्रिका कप अफ नेसन्सको क्वार्टरफाइनलमा प्रवेश गरेको छ ।
मङ्गलबार राति भएको अन्तिम १६ को खेलमा कापे भेर्डेमाथि २–० गोलको जित निकाल्दै सेनेगल अघिल्लो चरणमा पुगेको हो ।
सेनेगलको जितमा साडियो माने र बम्बा डिङले एक–एक गोल गरे ।
पहिलो हाफ गोलरहित बराबरीमा सकिएको उक्त खेलको दोस्रो हाफमा सेनेगलले दुई गोल गरेको थियो ।
सेनेगलले सुरुआती अग्रता बनाउनुअघि भेर्डे नौ खेलाडीमा सीमित बनेको थियो ।
खेलको २१औँ मिनेटमा प्याट्रिक एन्ड्रेडले रातो कार्ड पाएपछि १० खेलाडीमा सीमित बनेको भेर्डेका गोलरक्षकले पनि रेड कार्ड पाएका थिए ।
५७औँ मिनेटमा भोजिन्हाले रातो कार्ड पाएपछि भेर्डे नौ खेलाडीमा समेटियो ।
६३औँ मिनेटमा मानेले गोल गर्दै सेनेगललाई सुरुआती अग्रता दिलाए ।
खेलको इन्ज्युरी समयमा डिङले गोल गरेपछि सेनेगल २–० गोलले विजयी भएको हो ।
