आहा रारा गोल्डकपको चौथो क्वाटरफाइनलमा अहिले विभागीय टोली त्रिभुवन आर्मी फुटबल क्लब र थ्रीस्टार क्लबले खेलिरहेका छन् ।
पोखरा रङ्गशालामा जारी खेलको पहिलो हाफ गोलरहित बराबरीमा सकिएको छ ।
निकै नै प्रतिस्पर्धात्मक बनेको खेलमा दुवै टोलीले एक-अर्काविरुद्ध गोल गर्न सकेका छैनन् ।
यस खेलको विजेता टिमले सेमिफाइनलमा स्थान बनाउने छन् । दुवै टोली गोल्डकपमा अनुभवी टोली हुन् ।
चार पटक उपविजेता बनेको आर्मीले आज पाँच पटक आहा रारा गोल्डकपको उपाधि जितिसकेको थ्रीस्टारलाई सामना गर्दैछ ।
आजको खेलमा थ्रीस्टारलाई पाखा लगाउन सके आर्मीले २०७५ को फाइनलमा भोगेको हारको बदला लिनेछ । निर्धारित समयमा बराबरी भएपछि उपाधि छिनोफानोका लागि भएको टाइब्रेकरमा थ्रीस्टारले बाजी मार्दा आर्मी खाली हात फर्किएको थियो ।
आजको अन्तिम क्वाटरफाइनल जित्ने टोलीले फाइनल प्रवेशका लागि मनाङ मर्स्याङ्दीसँग माघ १३ गते प्रतिस्पर्धा गर्नेछ । नेपाल पुलिस क्लबलाई २–० ले स्तब्ध बनाउँदै मनाङले सेमिफाइनलमा स्थान बनाइसेको छ ।
सहारा क्लब पोखराको आयोजनामा भइरहेको प्रतियोगिताका अन्य दुई सेमिफाइनलिस्ट टोलीका रुपमा नेपाल एपिएफ क्लब र मछिन्द्र क्लब रहेका छन् ।
प्रतियोगिताको विजेताले १० लाख १ हजार र उपविजेता टिमले ५ लाख १ हजार प्राप्त गर्नेछन् ।
