दुई सय ३१ रनको विशाल लक्ष्य पछ्याएको नेपाल आर्मीलाई ४७ रनले रोक्दै एपिएफ क्लब प्रधानमन्त्री कप (पिएम कप) टी–२० राष्ट्रिय क्रिकेट प्रतियोगिताको फाइनलमा प्रवेश गरेको छ ।
एपिएफका तीन खेलाडीले अर्धशतक बनाएपछि दुई सय ३१ रनको विशाल लक्ष्य पछ्याएको आर्मी सुरुवातबाट नै दबाबमा खेलेको थियो ।
आर्मीका लागि राजेश पुलामीले सर्वाधिक ३८ रन जोडेका थिए । त्यसबाहेक, भीम सार्कीले ३५, सुमित श्रेष्ठले २४, हरी चौहनले २२ रन बनाएका थिए ।
विशाल लक्ष्य पछ्याएको आर्मीले पावर प्लेमा दुई विकेट गुमाएर ५७ रन बनाएर जवाफी इनिङ सुरुवात गरेको थियो ।
तर आर्मीलाई रोक्न एपिएफका कप्तान शरद भेषवाकरको घातक बलिङले मद्दत गर्याे ।
चार ओभर बलिङ गरेका उनले १६ रन खर्चिदै महत्वपूर्ण तीन विकेट लिए । भेषवाकरले भीम सार्की, हरी चौहान र तुल थापालाई पेभिलियन फर्काएका थिए ।
आजै भएको पहिलो सेमिफाइनलमा नेपाल पुलिस क्लबले वाग्मती प्रदेशलाई ५० रनले हराउँदै फाइनलमा स्थान सुरक्षित गरिसकेको छ ।
दुवै टोली आ–आफ्नो समूहको विजेता भन्दै सेमिफाइनलमा आइपुगेका थिए ।
समूह चरणका चार खेलमा अपराजित रहेका एपिएफ र पुलिसले सेमिफाइनलमा पनि आ–आफ्ना प्रतिद्वन्द्वीलाई हराएसँगै फाइनल जित्ने टोली अपराजित रहँदै पिएम कप राष्ट्रिय टी–२० क्रिकेट प्रतियोगिताको उपाधि जित्न सफल हुनेछ ।
फाइनल खेल भोलि (बुधबार) कीर्तिपुरस्थित टीयू मैदानमा बिहान नौ बजेबाट सुरु हुनेछ । प्रतियोगिताको विजेताले पाँच र उपविजेताले तीन लाख रुपैयाँ प्राप्त गर्नेछन् ।
त्यसबाहेक व्यक्तिगत विधातर्फ सर्वाेत्कृष्ट खेलाडीले ३० हजार, उत्कृष्ट ब्याटर र बलरले समान २०–२० हजार प्राप्त गर्नेछन् ।
