प्रधानमन्त्री कप (पिएम) टि-ट्वान्टी क्रिकेट प्रतियोगिताअन्तर्गत मङ्गलबार पहिलो सेमिफाइनल खेलमा नेपाल पुलिस क्लबले वाग्मती प्रदेशलाई मध्यम लक्ष्य दिएको छ ।
टियु क्रिकेट मैदानमा जारी खेलमा पुलिसले फाइनल पुग्न प्रदेशलाई १५६ रनको मध्यम लक्ष्य दिएको हो । टस जितेर ब्याटिङ रोजेको पुलिसले निर्धारित २० ओभरमा ५ विकेट गुमाउँदै १ सय ५५ रन बनाएको हो ।
पुलिसका ओपनर पवन सरार्फले सर्वाधिक ५९ रन जोडे भने दिलीप नाथले अजिवति ३१ रन बनाए । अनिल साहले २५ रन जोडे भने आरिफ शेख १२ रनमा आउट भए ।
बागमतीका रिजन ढकाल र नन्दन यादवले समान २-२ विकेट लिए । प्रतिश जिसीले १ विकेट लिए ।
पुलिसले समूह ‘ए’ मा सबै चारवटै खेल जितेर समूह विजेताको रूपमा सेमिफाइनलमा प्रवेश गरेको हो ।
यस्तै, वाग्मती प्रदेश समूह ‘बी’ को उपविजेताको रूपमा अन्तिम चारमा प्रवेश गरेको हो । वाग्मतीले चार खेलमध्ये तीन खेलमा जित हात पारेको थियो ।
पुलिस र वाग्मतीबीचको विजेता टिमले त्रिभुवन आर्मी क्लब र एपिएफबीचको विजेता टिमसँग खेल्नेछ ।
पुस २६ देखि सुरु भएको प्रतियोगिताको फाइनल खेल भोलि त्रिवि मैदानमा हुनेछ ।
प्रतियोगिता विजेताले पाँच लाख र उप विजेताले तीन लाख रुपैयाँ प्राप्त गर्नेछन् । प्रतियोगिता सर्वोत्कृष्ट खेलाडी (प्लेयर अफ द टुनामेन्ट) ले ३० हजार प्राप्त गर्नेछन् । प्रतियोगिता उत्कृष्ट ब्याटर र बलरले समान २०-२० हजार प्राप्त गर्नेछन् ।
