इटालियन सुपर कपको सर्वाधिक सफल टिम युभेन्टसलाई हराउँदै इन्टर मिलानले उपाधि जितेको छ । बुधबार भएको फाइनल खेलमा नौ पटकको विजेता टिम युभेन्टलाई २–१ गोलले हराउँदै इन्टरले उपाधि आफ्नो पोल्टामा पारेको हो ।
इन्टरले भने छैटौँ पटक उपाधि जितेको हो । घरेलु मैदान सान सिरोमा भएको खेलमा युभेन्टसले बनाएको सुरुआती अग्रता उल्टाउँदै इन्टरले जित निकालेको हो ।
२५औँ मिनेटमा वेस्टन केनीले गोल गर्दै युभेन्टसलाई सुरुवाती अग्रता दिलाएका थिए । तर खेलको ३५औँ मिनेटमा लाउटारो मार्टिनेजले पेनाल्टीमा गोल गर्दै इन्टरलाई बराबरीमा फर्काए ।
खेलको निर्धारित समय १–१ गोलको बराबरीमा सकिएपछि खेल अतिरिक्त समयमा धकेलिएको थियो । अतिरिक्त समयमा एलेक्सिस सान्चेजले गोल गरेपछि इन्टर विजेता बनेको हो ।
