स्पेनिस ला लिगामा लिग लिडर रियल मड्रिडले भ्यालेन्सियामाथि सहज जित निकालेको छ । शनिबार राति घरेलु मैदानमा रियलले भ्यालेन्सियालाई ४–१ गोलले हराएको हो ।
रियललाई जित दिलाउन करिम बेन्जिमा र भिनिसियस जुनियरले दुई–दुई गोल गरे भने भ्यालेन्सियाका गोन्कालो गुइडेसले एक गोल गरे ।
खेलको ४३औँ मिनेटमा रियलले पेनाल्टी पाएको थियो, जसमा बेन्जिमाले गोल गर्दै रियललाई सुरुवाती अग्रता दिलाए । ५२औँ मिनेटमा भिनिसियसले गोल गर्दै रियललाई २–० गोलको अग्रता दिलाए ।
६१औँ मिनेटमा भिनिसियसले दोस्रो गोल गर्दै रियलको अग्रता तेब्बर बनाए । ७६औँ मिनेटमा गुइडेसले गोल गर्दै भ्यालेन्सियालाई खेलमा फर्काउने कोसिस गरे । ८८औँ मिनेटमा बेन्जिमाले व्यक्तिगत दोस्रो गोल गर्दै रियललाई ४–१ गोलको जित दिलाए ।
जितसँगै शीर्ष स्थानको रियलले २१ खेलमा ४९ अङ्क जोडेको छ । उसले दोस्रो स्थानको सेभिल्लाभन्दा आठ अङ्कको अग्रता बनाएको छ । १९ खेल खेलेको सेभिल्लाले ४१ अङ्क जोडेको छ ।
