काठमाडौं । जिल्ला अदालत काठमाडौंले पत्रकार किशोर श्रेष्ठलाई तीन दिन हिरासतमा राखेर अनुसन्धान गर्न अनुमति दिएको छ।
न्यायाधीश उमेशप्रसाद लुइँटेलको इजलासले श्रेष्ठविरुद्ध अनुसन्धानका लागि तीन दिनको म्याद थप गर्ने अनुमति दिएको हो। श्रेष्ठलाई प्रहरीले बुधबार राति ललितपुरस्थित आफ्नै निवासबाट पक्राउ गरेको थियो।
श्रेष्ठ जनआस्था साप्ताहिक तथा जनआस्था डटकमका सञ्चालक एवं सम्पादक हुन्। प्रहरीले उनलाई व्यक्तिगत गोपनीयता हननसम्बन्धी कसुरमा पक्राउ गरिएको जनाएको छ।
श्रेष्ठको रिहाइको माग गर्दै नेपाल बार एसोसिएसनका पदाधिकारी तथा विभिन्न कानुन व्यवसायीहरूले अदालतमा बहस गरेका थिए। उनलाई थुनामुक्त गर्न माग गर्दै नेपाल बारका अध्यक्ष डा. विजय मिश्रसहित शम्भू थापा, गोविन्द बन्दी, अम्बर राउतलगायत कानुन व्यवसायीहरूले बहस गरेका हुन्।
श्रेष्ठलाई हाल जिल्ला प्रहरी परिसर काठमाडौंको हिरासतमा राखिएको छ। उनको पक्राउको विरोध गर्दै पत्रकारसम्बन्धी विभिन्न संघसंस्थाले रिहाइको मागसहित प्रदर्शनसमेत गर्दै आएका छन्।
