विराटनगर । आवश्यक कानुनी प्रक्रिया र स्वास्थ्यसम्बन्धी मापदण्ड पूरा नगरी विशेषज्ञ सेवा सञ्चालन गरेको पाइएपछि विराटनगरका सातवटा निजी आँखा अस्पताल तथा स्वास्थ्य संस्थामा प्रशासनले शिलबन्दी गरेको छ।
जिल्ला प्रशासन कार्यालय मोरङ र स्वास्थ्य मन्त्रालय, कोशी प्रदेशको संयुक्त अनुगमनका क्रममा ती संस्थाले प्रचलित कानुनी व्यवस्था तथा आवश्यक मापदण्ड पूरा नगरी सेवा सञ्चालन गरिरहेको भेटिएपछि कारबाही गरिएको हो।
अनुगमनका क्रममा विराटनगर–१४ को विराट आँखा अस्पताल, विराटनगर–१५ को इफराह आँखा अस्पताल, विराटनगर–१० को सञ्जीवनी आइ केयर, विराटनगर–१३ को हिमाल आँखा अस्पताल, विराटनगर–९ को विराट रानी आँखा अस्पताल, विराटनगर–१५ को अखण्ड ज्योति आँखा अस्पताल प्रालि र विराटनगर–१३ को नेपाल आँखा अस्पताल प्रालि शिलबन्दी गरिएको जिल्ला प्रशासन कार्यालय मोरङका सहायक प्रमुख जिल्ला अधिकारी पवनराज कोइरालाले जानकारी दिए।
प्रशासनका अनुसार ती स्वास्थ्य संस्थामा आवश्यक स्वीकृति तथा मापदण्ड पूरा नगरी विशेषज्ञ प्रकृतिका स्वास्थ्य सेवा सञ्चालन भइरहेको पाइएको थियो। अनुगमनपछि सम्बन्धित निकायले तत्काल सेवा सञ्चालनमा रोक लगाउँदै संस्थामा शिलबन्दी गरेको हो।
स्वास्थ्य संस्थाहरूले कानुनी प्रक्रिया पूरा नगरी सेवा सञ्चालन गर्दा बिरामीको स्वास्थ्य तथा उपचारको गुणस्तरमा जोखिम उत्पन्न हुन सक्ने भएकाले मापदण्डको पालना गराउन अनुगमनलाई तीव्रता दिइएको प्रशासनले जनाएको छ।
अनुगमनका क्रममा मापदण्ड पूरा नगरेका अन्य स्वास्थ्य संस्था फेला परेमा आवश्यकताअनुसार कारबाही अघि बढाइने प्रशासनको भनाइ छ।
