अखिल नेपाल फुटबल सङ्घ (एन्फा)का पूर्वअध्यक्ष गणेश थापाले मंगलबार संस्थाको कार्यकारिणी समितिको बैठकमा आफ्नो धारणा राख्न माग गरेका छन् । उनले एन्फा अध्यक्ष कर्माछिरिङ शेर्पालाई पत्र लेख्दै पुस २२ मा बोलाइएको कार्यकारिणी समितिको बैठकमा आफ्नो धारणा राख्न दिन माग गरेका हुन् ।
फिफाबाट प्रतिबन्धमा परेका पूर्वअध्यक्ष थापाले आफूले एन्फालाई लेखेको पत्र पनि सार्वजनिक गरेका छन् । उनले एउटा खेलाडी, राष्ट्रिय टोलीको कप्तान र एन्फा अध्यक्षको रूपमा रहेर लामो समय नेपाली फुटबलमा सेवा गरेको विदितै रहेको उल्लेख गर्दै अहिलेको नेतृत्वले आफूमाथि लगाएका आरोप निराधार रहेको दाबी पनि गरेका छन् ।
उनले पत्रमा लेखेका छन्, ‘तपाईंले लगाएका आधारहीन अरोपबारे सङ्घको कार्यकारिणी समितिमा कुरा राख्दै कार्यकारिणी समितिमार्फत आम जनमानसमा जानकारी गराउनु मेरो लागि अनिवार्य बनेको छ । तपाईंले लगाएका आरोपहरूमाथि संवैधानिक आयोग अख्तियार दुरुपयोग अनुसन्धान आयोग र फिफाले विशेष टोली पठाएर अखिल नेपाल फुटबल संघमाथि गरेको छानबिनपश्चात सफाई दिएको विषय संघ र यसका पदाधिकारीलाई जानकारी भएकै हो।’
उनले पत्रमा शेर्पाले नै निवर्तमान अध्यक्ष नरेन्द्र श्रेष्ठको अध्यक्षतामा बसेको संघको कार्यकारिणी समितिको बैठकमा संवैधानिक आयोगको निर्णय स्वीकार्दै विगतमा आफूमाथि लगाइएका सबै आरोपप्रति आत्मालोचना गरेको दाबी पनि गरेका छन् ।
सात वर्षदेखि एन्फाले लगाएका निराधार आरोपले एउटा खेलाडी र व्यवस्थापकका रूपमा इमान्दारीपूर्वक गरेका काममाथि भ्रम सिर्जना भएको र यसबाट आफ्नो र परिवारमा अत्यन्तै गहिरो गरी मानसिक आघात पुगेको पनि थापाले पत्रमा उल्लेख गरेका छन् ।
