जेनजी आन्दोलनका क्रममा घाइते भएका शन्तनु ढकालको दोस्रो ठूलो शल्यक्रिया हुने भएको छ। उक्त शल्यक्रिया करिब १२ घण्टासम्म चल्ने बताइएको छ।
शन्तनुको उपचारलाई लिएर निकोलस भुसालले सरकारले सहयोग गर्ने आश्वासन दिए पनि अपेक्षाअनुसार सहयोग नगरेको भन्दै असन्तुष्टि व्यक्त गरेका छन्।
सामाजिक सञ्जालमार्फत आफ्नो धारणा सार्वजनिक गर्दै भुसालले नेपालमा हुने ठूला शल्यक्रियामध्ये एक हुन लागेको अवस्थामा पनि शन्तनुले सरकारी सहयोग नपाएको भन्दै दुःख व्यक्त गरेका हुन्।
उनले चुनावका बेला आफ्नै गाडीमा राखेर घुमाएका व्यक्ति अहिले प्रधानमन्त्री हुँदा पनि शन्तनुको उपचारमा सहयोग नपुगेको भन्दै प्रश्न उठाएका छन्।
भुसालले शन्तनुको शीघ्र स्वास्थ्यलाभको कामना गर्दै उपचारका लागि परिवार र आफन्त मिलेर ऋणधन जुटाइरहेको बताएका छन्। उनले कठिन परिस्थितिमा शन्तनुको उपचारका लागि परिवारले आर्थिक व्यवस्थापन गरिरहेको उल्लेख गरेका छन्।
शन्तनुको दोस्रो शल्यक्रिया र उपचारका लागि आवश्यक सहयोग जुटाउने प्रयास भइरहेका बेला भुसालको यो अभिव्यक्तिले सरकारी सहयोगको विषयलाई फेरि चर्चामा ल्याएको छ।