नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले छठ पर्वको अवसरमा देशवासीलाई शुभकामना व्यक्त गरेका छन्। उनले यस पर्वले सबैको जीवनमा नयाँ आशा, सकारात्मक ऊर्जा र समृद्धि प्रदान गरोस् भन्ने कामना गरेका हुन्।
आइतबार सामाजिक सञ्जालमार्फत शुभकामना सन्देश सार्वजनिक गर्दै ओलीले अस्ताउँदो सूर्यलाई अर्घ्य दिँदा कृतज्ञताको भावना जागृत हुने र उदाउँदो सूर्यको उपासनाले नयाँ आशा तथा उत्साह सञ्चार गर्ने बताएका छन्।
उनले छठ पर्वलाई शुद्धता, संयम र निष्ठाको प्रतीकका रूपमा व्याख्या गरेका छन्। सूर्यको आराधना गरिने यस पर्वले आरोग्य, सुख, समृद्धि र पारिवारिक कल्याणको कामना गर्ने उनको भनाइ छ।
ओलीका अनुसार छठले प्रकृतिका स्रोतप्रति सम्मान र जीवनप्रति सकारात्मक आस्था जगाउनुका साथै सामाजिक सद्भाव तथा सांस्कृतिक एकतालाई बलियो बनाउने सन्देश दिन्छ।
