प्रधानमन्त्री बालेन्द्र शाहले छठ पर्वले जीवनका हरेक अवस्थालाई समान रूपमा सम्मान गर्न सिकाउने बताएका छन्। उनले उदाउँदो सूर्यसँगै अस्ताउँदो सूर्यलाई पनि उत्तिकै श्रद्धा र सम्मानका साथ पूजा गर्नुपर्ने सन्देश दिएका हुन्।
छठ पर्वको अवसरमा शुभकामना सन्देश जारी गर्दै प्रधानमन्त्री शाहले यस पर्वलाई जीवनको गहिरो दर्शनसँग जोडिएको बताएका छन्। उनका अनुसार भगवान् सूर्यदेव र छठी माताको आराधना गरी मनाइने छठले परिवारको सुख, शान्ति, स्वास्थ्य र सन्तानको दीर्घायुको कामना गर्दछ।
शाहले छठको विशेष परम्पराका रूपमा अस्ताउँदो र उदाउँदो दुवै सूर्यलाई अर्घ्य दिने चलनको चर्चा गरेका छन्। यसले प्रकृतिप्रति कृतज्ञता प्रकट गर्नुका साथै जीवनका सबै परिस्थितिलाई समान महत्त्व दिन प्रेरित गर्ने उनको भनाइ छ।
चार दिनसम्म मनाइने छठको पहिलो दिन नहाय–खाय, दोस्रो दिन खरना, तेस्रो दिन साँझ अस्ताउँदो सूर्यलाई र चौथो दिन बिहान उदाउँदो सूर्यलाई अर्घ्य दिने परम्परा रहेको छ।
प्रधानमन्त्री शाहले सरकार सबै धर्म, संस्कृति र परम्पराको संरक्षण तथा प्रवर्द्धनमा प्रतिबद्ध रहेको पनि उल्लेख गरेका छन्। छठले सकारात्मक ऊर्जा प्रदान गर्दै सुशासन, सामाजिक न्याय र राष्ट्रिय समृद्धिको लक्ष्य हासिल गर्न प्रेरणा दिने विश्वास उनले व्यक्त गरेका छन्।
उनले शुभकामना सन्देशको अन्त्यमा मैथिली भाषामा पनि छठको शुभकामना दिँदै दीनानाथ र छठ परमेश्वरीले सबैको जीवनमा सुख, शान्ति र समृद्धि प्रदान गरून् भन्ने कामना गरेका छन्।
