नेपाली कांग्रेसले १५औँ महाधिवेशनबाट निर्वाचित नयाँ केन्द्रीय कार्यसमितिको विवरण अद्यावधिक गर्न निर्वाचन आयोगमा निवेदन दिएको छ।
पार्टीका महामन्त्री प्रदीप पौडेलले सोमबार सभापति गगनकुमार थापा नेतृत्वको नयाँ कार्यसमितिको विवरण आयोगमा बुझाएका हुन्।
प्रमुख निर्वाचन आयुक्त मानबहादुर कार्कीको उपस्थितिमा महामन्त्री पौडेलले आयोगका सचिव कृष्णप्रसाद काप्रीलाई आवश्यक कागजात हस्तान्तरण गरेका थिए।
राजनीतिक दलसम्बन्धी ऐनको दफा ५१ अनुसार पौडेलले नयाँ कार्यसमितिको विवरणसहित पार्टीका विभिन्न दस्तावेजसमेत आयोगमा पेस गरेका छन्।
आयोगमा बुझाइएका कागजातमा कांग्रेसको विधान संशोधनसम्बन्धी विवरण, महाधिवेशनबाट पारित राजनीतिक दस्तावेज, समसामयिक राजनीतिक दस्तावेज तथा महाधिवेशनका निर्णयहरू समावेश छन्।
नयाँ नेतृत्व चयनपछि पार्टीको आधिकारिक विवरण अद्यावधिक गर्ने प्रक्रियाअन्तर्गत कांग्रेसले निर्वाचन आयोगमा निवेदन दिएको हो।
