नेपाल र न्युजिल्यान्डबीच व्यापार, लगानी तथा आर्थिक सहकार्यका अवसर विस्तार गर्न नयाँ पहल अघि बढाइएको छ। न्युजिल्यान्ड नेपाल वाणिज्य संघले स्थापनाको दशौँ वार्षिकोत्सवका अवसरमा दुई देशबीच आर्थिक सम्बन्ध विस्तार गर्ने रूपरेखा सार्वजनिक गरेको हो।
नोभेम्बर १८ मा न्युजिल्यान्डको अकल्यान्डमा ‘नयाँ उचाइतर्फको यात्रा’ शीर्षकमा आयोजित कार्यक्रममा सरकारी तथा निजी क्षेत्रबीचको सहकार्यलाई थप प्रभावकारी बनाउने विषयमा छलफल गरिएको थियो। न्युजिल्यान्ड नेपाल वाणिज्य संघले नेपाली राजदूतावास र अकल्यान्ड व्यापारिक मण्डलसँगको सहकार्यमा कार्यक्रम आयोजना गरेको हो।
कार्यक्रमका क्रममा न्युजिल्यान्ड नेपाल वाणिज्य संघ र अकल्यान्ड व्यापारिक मण्डलबीच समझदारीपत्रमा हस्ताक्षर भएको छ। संघका अध्यक्ष राज महर्जन र अकल्यान्ड व्यापारिक मण्डलकी प्रमुख सञ्चालन अधिकृत लेआ गेट्सले समझदारीपत्रमा हस्ताक्षर गरेका हुन्।
संघका अध्यक्ष महर्जनका अनुसार यस समझदारीले नेपाल र न्युजिल्यान्डका व्यवसायीबीच प्रत्यक्ष सम्बन्ध विस्तार गर्नुका साथै व्यापार तथा लगानीका नयाँ अवसर सिर्जना गर्न सहयोग पुर्याउनेछ। विगत एक दशकमा तयार भएको आधारलाई उपयोग गर्दै आगामी दिनमा व्यापारिक सम्पर्क र सहकार्यलाई थप विस्तार गर्ने संघको लक्ष्य रहेको उनले बताए।
दुई देशबीच आर्थिक सहकार्यलाई गति दिन व्यापारिक प्रतिनिधिमण्डलको नियमित आदानप्रदान आवश्यक रहेको पनि महर्जनले उल्लेख गरे।
कार्यक्रममा क्यान्टरबरी विश्वविद्यालयका प्राध्यापक डा. राजेश ढकालले प्राविधिक क्षेत्रमा नेपाल र न्युजिल्यान्डका सरकारबीच हुन सक्ने सहकार्यका विषयमा प्रस्तुति दिएका थिए। त्यस्तै, संघकी उपाध्यक्ष मन्दिरा रिमालले उच्च शिक्षा क्षेत्रमा व्यावसायिक संस्थाहरूबीच सहकार्यका सम्भावनाबारे जानकारी गराएकी थिइन्।
नेपालका परराष्ट्रमन्त्री शिशिर खनालले पठाएको शुभकामना सन्देशमा संघले एक दशकदेखि दुई देशबीच व्यावसायिक सम्बन्ध र आर्थिक सहकार्य सुदृढ बनाउन खेलेको भूमिकाको प्रशंसा गरिएको थियो।
कार्यक्रममा न्युजिल्यान्ड सरकारका विभिन्न निकायका प्रतिनिधि, व्यवसायी तथा सामुदायिक संस्थाका अगुवाहरूको सहभागिता रहेको थियो।