विराटनगर । फिफा विश्वकप–२०२६ को नकआउट चरण (राउन्ड अफ ३२) मा साविक विजेता अर्जेन्टिनाले पहिलोपटक विश्वकप खेलिरहेको केप भेर्डेसँग प्रतिस्पर्धा गर्ने भएको छ।
समूह ‘एच’ को अन्तिम खेलमा केप भेर्डेले साउदी अरेबियासँग गोलरहित बराबरी खेलेपछि नकआउट चरणमा स्थान सुरक्षित गरेको हो। त्यही समूहको अर्को खेलमा स्पेनले उरुग्वेलाई १–० ले पराजित गर्दै समूह विजेता बनेपछि केप भेर्डे उपविजेताका रूपमा अन्तिम ३२ मा प्रवेश गरेको हो।
यससँगै समूह ‘जे’ को विजेता अर्जेन्टिना र समूह ‘एच’ को उपविजेता केप भेर्डेबीच अन्तिम ३२ मा रोमाञ्चक भेट तय भएको छ।
करिब पाँच लाख जनसंख्या भएको सानो अफ्रिकी राष्ट्र केप भेर्डेले आफ्नो पहिलो विश्वकप सहभागितामै नकआउट चरण पुगेर सबैलाई चकित पारेको छ। समूह चरणमा स्पेन, उरुग्वे र साउदी अरेबियाविरुद्ध लगातार तीन बराबरी खेल्दै उसले ऐतिहासिक उपलब्धि हासिल गरेको हो।
यता अर्जेन्टिना भने समूह चरणमै प्रभावशाली प्रदर्शन गर्दै अगाडि बढेको छ। कप्तान लियोनेल मेस्सीको उत्कृष्ट लयका कारण अर्जेन्टिना उपाधि रक्षा अभियानलाई निरन्तरता दिने लक्ष्यमा रहेको छ।
अब विश्व फुटबलका शक्तिशाली राष्ट्र अर्जेन्टिना र ‘सिन्डेरेला टोली’का रूपमा उदाएको केप भेर्डेबीचको यो भिडन्त नकआउट चरणकै सबैभन्दा चासोको खेलमध्ये एक हुने अपेक्षा गरिएको छ।
