काठमाडौं । नेपाल राष्ट्रिय क्रिकेट टोलीले यूएई राष्ट्रिय क्रिकेट टोली माथि ६ रनको रोमाञ्चक जित निकाल्दै आईसीसी क्रिकेट विश्वकप लिग–२अन्तर्गतको घरेलु सिरिजमा महत्वपूर्ण सफलता हात पारेको छ।
वर्षाका कारण डीएल मेथडअनुसार ३८ ओभरमा २५५ रनको लक्ष्य पाएको यूएईले ८ विकेट गुमाएर २४८ रन मात्र बनाउन सक्यो।
यूएईका लागि मोहम्मद शाहदादले ६५ रन बनाउँदै संघर्ष गरे। उनले हर्पित सिंहसँग तेस्रो विकेटका लागि ८० रनको साझेदारी गरेका थिए। सिंहले ४१ रन बनाए भने आर्यशं शर्मा (३३), अदीब उसमानी (१४), मोहम्मद जुहैब (१) र कप्तान मोहम्मद वासिम (०) सस्तैमा आउट भए। खैजइमा विन तन्विरले २६ बलमा ४९ रन बनाए पनि टोलीलाई जित दिलाउन पर्याप्त भएन।
नेपालका लागि सन्दीप लामिछाने ले ३ विकेट लिए। सोमपाल कामी र नन्दन यादवले दुई–दुई विकेट लिए भने अन्य एक विकेट पनि नेपालकै पक्षमा गयो।
यसअघि त्रिवि क्रिकेट मैदानमा टस जितेर पहिले ब्याटिङ गरेको नेपालले निर्धारित ५० ओभरमा ७ विकेट गुमाएर २८९ रन बनाएको थियो।
नेपालका उपकप्तान दीपेन्द्रसिंह ऐरीले उत्कृष्ट शतक प्रहार गर्दै ९४ बलमा १०० रन बनाए। उनले १३ चौका र एक छक्का प्रहार गरे। विनोद भण्डारीले कमब्याक खेलमै ५६ रनको योगदान दिँदै अर्धशतक बनाए।
गुल्सन झा (४४), कप्तान रोहित पौडेल (३९), अर्जुन कुमाल (११), आरिफ शेख (११) र भीम सार्की (०) रनमा आउट भए। सोमपाल कामी शून्य रनमा अविजित रहे।
यूएईका अजय कुमार र जुनैद सिद्दिकीले २–२ विकेट लिए भने हैदर अली र खैजइमा विन तन्विरले एक–एक विकेट हात पारे।
अब नेपालले आफ्नो चौथो खेलमा मंगलबार ओमान राष्ट्रिय क्रिकेट टोलीसँग प्रतिस्पर्धा गर्नेछ।
