विराटनगर । हाल जारी १९औं संस्करणको इन्डियन प्रिमियर लिग (आइपिएल) मा मंगलबार राति पञ्जाब किंग्स र गुजरात टाइटन्सबीच रोमाञ्चक प्रतिस्पर्धा भयो । जारी आइपिएलको चौथो म्याचमा डिफेन्डिङ च्याम्पियन पञ्जाबले गुजरातमाथि ३ विकेटको जित दर्ता गर्यो ।
चन्दीगढको न्यू इन्टरनेसनल क्रिकेट स्टेडियममा भएको खेलमा गुजरातलाई हराउँदै पञ्जाबले पहिलो जित दर्ता गरी सुखद सुरुआत गर्यो । तर, पञ्जाबका कप्तान श्रेयस अय्यरका लागि भने यो खेल सुखद् रहेन । श्रेयसले नेतृत्व गरेको टोलीले जित निकाल्दा उनीमाथि भने १२ लाख रुपैयाँको जरिवाना तिर्नुपर्यो । त्यो पनि गुजरातसँगको खेलका क्रममा गरेको एउटा सानो गल्तीका कारण ।
भारतीय क्रिकेट बोर्डले पञ्जाबका स्टार ब्याट्म्यान श्रेयसमाथि १२ लाख रुपैयाँको जरिवाना तोकेको हो । गुजरात टाइटान्सविरुद्ध स्लो ओभर रेटका लागि बिसिसिआईले उक्त कारबाही गरेको हो । आइपिएलले विज्ञप्ति गर्दै आफ्नो आचार संहिताविपरीत कार्य गरेको भन्दै श्रेयसलाई कारबाही गरिएको जनाएको छ ।
श्रेयसले जारी सिजनमा पहिलोपटक यो नियम उल्लंघन गरेका हुन् । अघिल्लो सिजनमा पनि उनीमाथि बिसिसिआईले स्लो ओभर रेटका लागि नै सजाय दिएको थियो । एक पटक मात्र नभएर लगातार दोस्रो पटक श्रेयस कारबाहीमा परेका हुन् । पहिलो पटक १२ लाखको जरिवाना तोकेको उनले दोस्रो पटक २४ लाख तिर्नुपरेको थियो ।
स्मरण होस्, विकेट किपर तथा ब्याट्सम्यान ऋषभ पन्तमाथि २०२४ को आइपिएलमा लगातार तीन पटक स्लो ओभर रेटका कारण एक खेलमा प्रतिबन्ध लागेको थियो । साथै, उनले ३० लाख रुपैयाँ जरिवाना पनि तिर्नु परेको थियो । त्यसबेला पन्त दिल्ली क्यापिटल्सका कप्तान थिए, जबकि यो सिजन उनले लखनउ सुपर जाइन्ट्सको नेतृत्व गरिरहेका छन् ।
