काठमाडौं — मंगलबार नेप्से परिसूचक घटेर बन्द भएको छ। यस दिन कुल २१ अर्ब ५० करोड २० लाख रुपैयाँ बराबरको शेयर खरिदबिक्री भएको छ, जुन पछिल्लो ८ महिनायताकै उच्च कारोबार रकम हो।
यसअघि २०८२ साउन ५ गते २१ अर्ब ४६ करोड रुपैयाँ बराबरको कारोबार भएको थियो। मंगलबार नेप्से ३२.०८ अंकले घटेर २८४३.३५ विन्दुमा झरेको छ। प्रतिनिधिसभा निर्वाचनपछि दोस्रो कारोबार दिन बजार घटेर बन्द भएको हो।
त्यस्तै, सेन्सेटिभ इन्डेक्स ०.८९ अंक, फ्लोट इन्डेक्स १.१२ अंक र सेन्सेटिभ फ्लोट इन्डेक्स १.१४ अंक घटेको छ।
यसअघि सोमबार भने नेप्सेमा तीन सर्किट ब्रेक लागेर बजार समयअगावै बन्द भएको थियो। सोमबार नेप्से १६२.९३ अंक बढेर २८७५.४३ विन्दु पुगेको थियो। निर्वाचनपछि राष्ट्रिय स्वतन्त्र पार्टी ले स्पष्ट बहुमत ल्याउने संकेत देखिएपछि लगानीकर्तामा उत्साह बढेको थियो।
मंगलबार रिलायन्स स्पिनिङ मिल्स र सालपा विकास बैंक को शेयर सकारात्मक सर्किट लेभलमा कारोबार भएको छ। त्यस्तै थ्रि स्टार हाइड्रोपावर को शेयर मूल्य ९.०८ प्रतिशत र कालिका पावर हाइड्रोपावर कम्पनी को शेयर ८ प्रतिशतभन्दा बढी बढेको छ।
सबैभन्दा बढी घट्ने कम्पनीमा हिम स्टार कम्पनी परेको छ, जसको शेयर मूल्य ६.३६ प्रतिशतले घटेको छ।
कारोबार रकमका आधारमा न्यादी ग्रुप पावर कम्पनी शीर्ष स्थानमा रह्यो। सो कम्पनीको १ अर्ब ९ करोड ७३ लाख रुपैयाँ बराबरको शेयर कारोबार भएको छ। त्यसपछि आँखुखोला हाइड्रोपावर को ६९ करोड ६४ लाख रुपैयाँभन्दा बढीको शेयर किनबेच भएको छ।
१३ उपसमूहमध्ये ३ उपसमूहको परिसूचक बढ्दा १० उपसमूह घटेका छन्। म्युचुअल फण्ड उपसमूह १.३४ प्रतिशतले बढेको छ भने जीवन बीमा र निर्जीवन बीमा उपसमूह सामान्य बढेका छन्।
त्यसैगरी व्यापार उपसमूह २.१२ प्रतिशतले घट्दै सबैभन्दा धेरै गिरावट आएको छ। फाइनान्स २.०६ प्रतिशत घटेको छ भने बैंकिङ, विकास बैंक, होटल, लगानी तथा अन्य उपसमूह पनि १ प्रतिशतभन्दा बढी घटेका छन्।
