काठमाडौं – आइसीसी मेन्स टी २० वर्ल्ड कप २०२६ अन्तर्गत सुपर–८ चरणका दुई महत्वपूर्ण खेल आज हुँदैछन्। शनिबारबाट सुरु भएको सुपर–८ को पहिलो खेल वर्षाका कारण अवरुद्ध हुँदा न्युजिल्याण्ड र पाकिस्तानले अंक बाँडेका थिए।
२० राष्ट्र सहभागी प्रतियोगिताबाट आयोजक भारत र श्रीलंकासहित जिम्बावे, वेस्ट इन्डिज, दक्षिण अफ्रिका, पाकिस्तान, इंग्ल्यान्ड र न्युजिल्याण्ड सुपर–८ मा पुगेका छन्।
सुपर–८ को समूह १ मा भारत, दक्षिण अफ्रिका, वेस्ट इन्डिज र जिम्बावे रहेका छन् भने समूह २ मा इंग्ल्यान्ड, न्युजिल्याण्ड, पाकिस्तान र श्रीलंका छन्।
आइतबार हुने पहिलो खेलमा श्रीलंका र इंग्ल्यान्डबीच प्रतिस्पर्धा हुनेछ। इंग्ल्यान्ड समूह ‘सी’बाट तीन जित र एक हारसहित सुपर–८ मा पुगेको हो भने श्रीलंका समूह ‘बी’बाट समान नतिजासहित उपविजेताका रूपमा अघि बढेको हो। दुवै टोली उपविजेता रहँदै सुपर–८ मा प्रवेश गरेका हुन्। खेल दिउँसो ३:१५ बजे सुरु हुनेछ।
दोस्रो खेलमा साविक विजेता भारत र उपविजेता दक्षिण अफ्रिकाबीच कडा प्रतिस्पर्धा हुनेछ। भारतमा हुने यो खेल साँझ ७:१५ बजे सुरु हुनेछ। भारत समूह ‘ए’को विजेता हो भने दक्षिण अफ्रिका समूह ‘डी’को विजेता बनेको थियो। समूह चरणमा दुवै टोली अपराजित रहँदै सुपर–८ मा पुगेका छन्।
टी–२० विश्वकप २०२६ को फाइनल फागुन २४ गते हुने तालिका छ। नेपाल भने समूह चरणबाटै बाहिरिँदै प्रतियोगिताबाट घर फर्किसकेको छ।
