जित हातमै आएको जस्तो देखिएको खेलमा नेपालले फेरि अन्तिम ओभरको दबाब थेग्न सकेन। कप्तान रोहित पौडेल र उपकप्तान दीपेन्द्र सिंह ऐरीको संयमित साझेदारी तथा लोकेश बमको आक्रामक ब्याटिङ हुँदाहुँदै नेपाल आईसीसी टी–२० विश्वकपमा इङ्ल्यान्डसँग ४ रनले पराजित भएको छ।
१ सय ८५ रनको लक्ष्य पछ्याएको नेपालले निर्धारित २० ओभरमा ७ विकेट गुमाउँदै १ सय ८० रन मात्र बनाउन सक्यो। अघिल्लो विश्वकपमा दक्षिण अफ्रिकासँग १ रनले हारेको नेपाल यसपटक पनि अन्तिम क्षणमा पुगेपछि निराश बन्नुपर्यो।
नेपाललाई अन्तिम ओभरमा जितका लागि १० रन चाहिएको थियो। तर दबाबपूर्ण परिस्थितिमा ब्याट्सम्यानहरूले खुलेर खेल्न सकेनन् र ५ रनमा सीमित भए।
इनिङ्स सम्हाल्ने क्रममा दीपेन्द्र सिंह ऐरी र रोहित पौडेलले तेस्रो विकेटका लागि ८२ रनको महत्वपूर्ण साझेदारी गरे। दीपेन्द्रले २९ बलमा ६ चौका र १ छक्कासहित ४४ रन बनाए भने रोहितले ३९ रन जोडे। यी दुई आउट भएपछि नेपालको रन गति सुस्त भयो।
ओपनर कुशल भुर्तेलले आक्रामक सुरुआत गर्दै १७ बलमा २९ रन बनाए। आसिफ शेख ७ र आरिफ शेख १० रनमा आउट भए। अन्त्यतिर लोकेश बमले २० बलमा ३९ रनको विस्फोटक इनिङ्स खेले पनि त्यो पर्याप्त भएन।
यसअघि टस जितेर ब्याटिङ रोजेको इङ्ल्यान्डले २० ओभरमा ७ विकेट गुमाउँदै १ सय ८४ रन बनाएको थियो। खेलभर नेपालले बराबरीको प्रतिस्पर्धा दिएको भए पनि अन्तिम ओभरमा अनुभवको अभाव स्पष्ट देखियो।
