काठमाडौँ । नेपाली राष्ट्रिय क्रिकेट टिमले आज आईसीसी टी–२० विश्वकप अन्तर्गत पहिलो वार्मअप खेल खेल्दैछ।
नेपालले आज युएईविरुद्ध भारतको चेन्नईस्थित एमए चिदम्बरम स्टेडियममा प्रतिस्पर्धा गर्नेछ । खेल साँझ सवा ५ बजेदेखि सुरु हुनेछ।
यसपछि नेपालले दोस्रो वार्मअप खेल फेब्रुअरी ५ मा क्यानडाविरुद्ध चेन्नईमै खेल्ने तालिका छ । उक्त खेल दिउँसो सवा ३ बजेदेखि सुरु हुनेछ।
रोहित पौडेलको कप्तानीमा नेपाल टी–२० विश्वकपमा तेस्रो पटक सहभागी हुन लागेको हो। विश्वकपका लागि घोषित १५ सदस्यीय नेपाली टोलीमा रोहित पौडेल (कप्तान), दीपेन्द्र सिंह ऐरी (उपकप्तान), सन्दीप लामिछाने, कुशल भुर्तेल, आसिफ शेख, सन्दीप जोरा, गुल्सन झा, सोमपाल कामी, नन्दन यादव, ललित राजवंशी, लोकेश बम, आरिफ शेख, करण केसी, शेर मल्ल र बसिर अहमद रहेका छन्।
आईसीसी टी–२० विश्वकप आगामी फेब्रुअरी ७ देखि मार्च ८ सम्म भारत र श्रीलंकामा आयोजना हुनेछ। नेपाल रहेको समूहमा स्कटल्याण्ड, इङल्यान्ड, इटाली र वेष्ट इण्डिज छन्।
नेपालले समूह चरणमा फेब्रुअरी ८ मा इङल्यान्ड, १२ मा इटाली, १५ मा वेष्ट इण्डिज र १७ मा स्कटल्याण्डसँग खेल्नेछ। नेपालका सबै समूह चरणका खेल मुम्बईस्थित वाङखेडे स्टेडियममा हुने तालिका छ।
