विराटनगर । उच्च शिक्षालय तथा माध्यमिक विद्यालय संघ नेपाल (हिसान) मोरङको आयोजनामा सञ्चालन भइरहेको हिसान स्पोर्ट्स मिट २०८२ अन्तर्गत बुधबार सम्पन्न हिसान क्रिकेट प्रतियोगितामा शिक्षादीप कलेज र कान्तिपुर कलेज सेमिफाइनलमा प्रवेश गरेका छन्।
जुट मिल मैदानमा भएको पहिलो खेलमा शिक्षादीप कलेजले रेडस्टार कलेजलाई १५ रनले पराजित गर्दै सेमिफाइनल यात्रा तय गर्यो। टस जितेर ब्याटिङ गरेको शिक्षादीपले निर्धारित २० ओभरमा ९ विकेट गुमाउँदै १ सय १७ रनको योगफल तयार गर्यो। शिक्षादीपका सत्यम सदामले सर्वाधिक २१ रन बनाए। रेडस्टारका आयुष अधिकारीले ४ विकेट लिँदा सुधिर बस्नेतले ३ विकेट हात पारे।
जवाफमा १ सय १७ रनको लक्ष्य पछ्याएको रेडस्टार कलेज १९.५ ओभरमा सबै विकेट गुमाउँदै १ सय २ रनमै समेटियो। रेडस्टारका अभिषेक विकले सर्वाधिक १८ रन जोडे। शिक्षादीपका सोनु सिंहले ४ विकेट लिँदै प्लेयर अफ द म्याच घोषित भए।
दोस्रो खेलमा कान्तिपुर कलेजले कोवास कलेजलाई ९३ रनको फराकिलो अन्तरले पराजित गर्दै सेमिफाइनलमा स्थान बनायो। टस जितेर ब्याटिङ गरेको कान्तिपुरले निर्धारित २० ओभरमा ८ विकेट गुमाउँदै १ सय ९२ रनको विशाल योगफल तयार गर्यो। कान्तिपुरका शम्भु मण्डलले ६१ रन बनाउँदै प्लेयर अफ द म्याच भए भने सन्तोष गुप्ताले ४१ रनको योगदान दिए। कोवासका अमरेश यादवले सर्वाधिक ५ विकेट लिए।
जवाफमा १ सय ९३ रनको लक्ष्य पछ्याएको कोवास कलेज १५.५ ओभरमै सबै विकेट गुमाउँदै ९९ रनमा सीमित भयो। कोवासका राजित राजवंशीले सर्वाधिक १९ रन बनाए। कान्तिपुरका सन्तोष गुप्ताले २ विकेट लिँदा रामरतन यादवले पनि २ विकेट हात पारे ।
