काठमाडौं। नेपाली खेलाडी सानुमाया थिङ कराते वर्ल्ड च्याम्पियनसिपमा छनोट भएकी छन् ।
विश्व कराते महासंघका अनुसार उनी कन्टिनेन्टल च्याम्पियनसिपको कोटामार्फत प्रतियोगितामा छनोट भएकी हुन् ।
इजिप्टको कायरोमा नोभेम्बर २७ देखि ३० सम्म हुने विश्व च्याम्पियनसिपमा सानुमायाले महिला एकल कातामा भाग लिन पाउने छन् ।
वर्ल्ड कराते फेडेरेसन (डब्लूकेएफ) ले नेपाल कराते महासंघलाई पत्र पठाउँदै सानुमाथा विश्व कराते च्याम्पियनसिप खेल्नका लागि छनोट जानकारी गराएको छ ।
यही अगस्ट ९ सम्म उनको सहभागिता निश्चित गरिसक्नुपर्ने जनाएको छ ।
सानुमायाले उज्वेकिस्तानको तास्कन्दमा गत मेमा सम्पन्न २१ औं एकेएफ एसियन सिनियर कराते च्याम्पियनसिपमा उत्कृष्ट प्रदर्शन गर्दै पाँचौं स्थान हासिल गरेकी थिइन् ।
त्यही प्रदर्शनका आधारमा उनी विश्व च्याम्पियनसिपलाई छनोट भएको र नेपाली करातेका लागि यो एक अर्को ठूलो उपलब्धि भएको काताका उनका प्रशिक्षक मन्डेकाजी श्रेष्ठले बताएका छन् ।
नेपालले पहिलो पटक छनोट भएर करातेको विश्व च्याम्पिनयनसिप खेल्न लागेको हो ।
दक्षिण एसियाली कराते च्याम्पियनसिपकी टिम कातामा दुई पटक स्वर्ण जितेकी सानुमाया काताका राष्ट्रिय च्याम्पियन हुन् ।
