विराटनगर । सुनसरीको धरानमा सम्पन्न दोस्रो संस्करणको कोशी प्रदेश खुला गल्फ प्रतियोगिताको नेट विजेता विराटनगरका नितेश गुप्ता भएका छन् ।
धरानस्थित धरान गल्फ क्लबको गल्फ कोर्समा शनिबार भएको प्रतियोगिताको नेट विधातर्फ ९ अन्डर अंकसहित गुप्ता विजेता भएका हुन् ।
नेट तर्फको दोस्रो स्थान रमेश चौधरीले हासिल गर्न सफल भए भने तेस्रो स्थानमा राजीव घिमिरे रहे ।
प्रतियोगिताको ग्रसतर्फ ३ अन्डर अंकसहित सुमन परियार विजयी हुँदा उपविजेतामा गजेन्द्र लिम्बूले चित्त बुझाउनु परेको थियो ।
त्यस्तै, जुनियरतर्फको खेलमा दिपेश श्रेष्ठ विजेता र लक्की साह उपविजेता भए । प्रतियोगिताको सिनियर तर्फको खेलमा तुलसी लिम्बू जित्दा दोस्रो स्थानमा विजय राई रहेका थिए ।
महिलातर्फको खेलमा पोखराकी दानवी गुरुङ विजेता र उपविजेता सुमित्रा लिम्बू भइन् ।
प्रतियोगिताको नियरेस्ट टु द पिन विश्व गुरुङ, मोस्ट बर्डिज सरोज थापा र लंगेस्ट ड्राइभ धिरज लिम्बूले जित्न सफल भएका थिए ।
विजेताहरूलाई कोशी प्रदेशका मुख्यमन्त्री हिक्मतकुमार कार्की, कोशी प्रदेश गल्फ संघका अध्यक्ष सुयेश प्याकुरेललगायतले पुरस्कार वितरण गरेका थिए ।
पुरस्कार वितरणपछि बोल्दै मुख्यमन्त्री कार्कीले गल्फको विकासका लागि सहयोग गर्न प्रदेश सरकार सधैँ तयार रहेको बताए ।
यसैगरी, संघका अध्यक्ष प्याकुरेलले कोशी प्रदेश सरकारको सहयोगमा गल्फ टुर्नामेन्ट गराउन सफल भएको भन्दै मुख्यमन्त्री कार्कीलाई धन्यवाद ज्ञापन गरे ।
कोशी गल्फ एसोसिएसनको आयोजना र कोशी प्रदेश खेलकुद विकास बोर्डको प्रायोजनमा भएको प्रतियोगितामा कोशी प्रदेशका १४ जिल्लाका खेलाडी तथा पोखरा र भारतको सिलिगुरीका खेलाडीले सहभागिता जनाएका थिए ।
