विराटनगर । बलिउड अभिनेता सैफ अली खानमाथि चक्कु आक्रमण भएको छ ।
प्रहरीका अनुसार बुधबार राति एक अज्ञात समूह सैफ अली खानको घरमा पसेको थियो ।
त्यसपछि सैफ र ती व्यक्तिबीच झगडा भएको थियो । ती व्यक्तिले चक्कु प्रहार गरेपछि अभिनेता सैफ घाइते भएका थिए ।
प्रहरीले घटनाको अनुसन्धान जारी रहेको जनाएको बीबीसी समाचारमा उल्लेख छ ।
समाचार एजेन्सी एएनआईले मुम्बई प्रहरीलाई उदृध गर्दै भनेको छ- एक व्यक्ति सैफअली खानको घरमा पसेर पहिले उनको घरेलु कामदारसँग झगडा गरेको र त्यसमा सैफले हस्तक्षेप गर्न खोजेपछि सैफमाथि नै आक्रमण भएको हो।
अंग्रेजी पत्रिका हिन्दुस्तान टाइम्सको रिपोर्ट अनुसार बिहान करिब २.३० बजे सैफ अली खान र उनकी श्रीमती करीना कपूरको बान्द्रास्थित घरमा चोर पसेको थियो ।
त्यो समयमा सैफ आफ्नो परिवारसँग घरमा थिए । चोर घटनास्थलबाट भागेको र प्रहरीले आक्रमणकारीको खोजी गरिरहेको उल्लेख गरेको छ ।
उक्त रिपोर्टमा घटनाको बारेमा एक वरिष्ठ आईपीएस अधिकारीलाई उद्धृत गर्दै भनिएको छ, ‘सैफ अली खानलाई लीलावती अस्पतालमा भर्ना गरिएको छ ।’ सैफलाई राती ३:३० बजेतिर लीलावती अस्पताल ल्याइएको थियो ।
उनको शरीरमा छ ठाउँमा चोट लागेको छ । जसमध्ये दुई ठाउँमा गहिरो घाउ लागेको छ उपचाररत चिकित्सकले जनाएका छन् ।
एउटा घाउ मेरुदण्ड नजिकै छ । उनको शल्यक्रिया भइरहेको छ । शल्यक्रियापछि मात्र चोटको गहिराइ पत्ता लगाउन सकिने जनाइएको छ । सैफको घाँटीमा पनि चोट लागेको छ ।
