विराटनगर । पछिल्लो समय आर्टिफिसियल इन्टिलिजेन्स अर्थात् एआईको चर्चा व्यापक छ ।
टिकटक र फेसबुकमा एआईको दुरुपयोग गरी चरित्रहत्या गरेका भिडिओहरू आइरहेका छन् । यसको दुरुपयोग व्यापक रूपमै भइरहेको छ ।
तर, यसलाई सदुपयोग गर्न सके चर्चाको शिखरमा पुग्न सकिन्छ भन्ने उदाहरण बनेका छन्, नेपालका मौसम पुरी ।
नेपाली प्राविधिक क्षेत्रमा एउटा नयाँ र उत्साहजनक प्रयोगका रूपमा पुरीले एआई प्रविधिको प्रयोग गरी महाभारतको आकर्षक ट्रेलर निर्माण गरेका छन्, जसले अहिले निकै चर्चा पाइरहेको छ ।
एआई टुलको सहायतामा बनाइएको उक्त ट्रेलरलेसामाजिक सञ्जालमा व्यापक चर्चा पाइरहेको हो ।
नेप्टोनिक सफ्टवेयरका संस्थापक रहेका पुरी एक अनुभवी आइटी विशेषज्ञ पनि हुन् । जर्मनीबाट ‘अप्लाइड म्याथम्याटिक्स इन डिजिटल मिडिया’ मा स्नातकोत्तर गरेका पुरीले आफ्नो बाल्यकालदेखि नै महाभारतप्रति रहेको मोहलाई डिजिटल रूपमा साकार पार्ने प्रयास गरेका हुन् ।
फुर्सदको १५ दिन खर्चिएर पुरीले तयार पारेको महाभारतको दुई मिनेट लामो ट्रेलरमा देखाइएका विभिन्न दृश्यको चर्चा भइरहेको छ ।
एआईलाई रचनात्मक तरिकाले प्रयोग गरेर कसरी काम गर्न सकिन्छ भन्ने सोच्दा सोच्दै पुरीलाई महाभारतको ट्रेलर बनाउने आइडिया आएको थियो ।
स्नातक तहमा कम्प्युटर साइन्स अध्ययन गरेका पुरी सन् २०१४ मा स्नातकोत्तर गर्न जर्मनी गएका थिए ।
स्नातकोत्तर तहमा ‘अप्लाइड म्याथम्याटिक्स इन डिजिटल मिडिया’ अध्ययन गरेका उनी सन् २०१८ मा नेपाल फर्किए ।
त्यसपछि स्वदेशमै आईटी कम्पनी सञ्चालन गरेर विभिन्न सेवा र प्रडक्ट बिक्री गर्दै आएका छन् ।
बाल्यकालदेखि नै सबैभन्दा बढी हेरेको महाभारतबाट प्रभावित भएर ट्रेलर बनाएका पुरीले उक्त कामका लागि प्रिमियम एआई टुल मिडजर्नी, क्लिङ एआई र फ्लक्स एआई प्रयोग गरेका छन् ।
महाभारतका एउटै पात्रका विभिन्न तरिकाका फोटो तयार पार्न मिडजर्नी प्रयोग गरेका पुरीले त्यसलाई एनिमेसन गर्न रनवे एमएल प्रयोग गरेको थिए ।
भिडिओमा इमोसन देखाउन क्लिङ एआई प्रयोग गरेको पुरीले ट्रेलरमा के के राख्ने, कसरी मिलाउने, कुन दृश्य राख्ने भन्ने निर्धारण गर्न च्याटजीपीटीसमेत प्रयोग गरेका छन् ।
उक्त ट्रेलरमा प्रयोग भएको ब्याकग्राउन्ड म्युजिकका लागि पिक्साबे प्रयोग भएको छ भने फोटो एडिट गर्न क्यान्भा प्रयोग भएको छ ।
यी सबै तयार भइसकेपछि क्यापकटको वेब भर्सन र क्लिपच्याम्पबाट एडिट गरिएको उनले सुनाए ।
१५ दिनमा करिब ३० घण्टाजति काम गरेका पुरीले प्रिमियम एआई टुल खरिद गर्दा ३०० डलरजति खर्च गरेका छन् ।
पुरीले ट्रेलर सामाजिक सञ्जालमा राखिसकेपछि फिल्म क्षेत्रका निर्देशकहरू उनीसँग जोडिन आएका छन् ।
उनीहरूसँग कुरा भइरहेको बताउने पुरी प्रस्ताव आएमा पूरा फिल्म नै बनाउने चाहना रहेको सुनाउँछन् ।
एआईलाई चरित्र हत्या गर्ने साधन नबनाएर सकारात्मक प्रयोग गर्न पुरीको सुझाव छ ।
मौसम पुरीको उदाहरणले देखाएजस्तै, एआईको सदुपयोगले व्यक्तिगत र व्यावसायिक विकासका साथै समग्र समाजको विकासमा योगदान पुर्याउन सक्छ ।
तर यसको लागि एआईलाई जिम्मेवार र नैतिक तरिकाले प्रयोग गर्नु महत्त्वपूर्ण छ ।
