विराटनगर । लुम्बिनी लायन्सका कप्तान रोहित पौडेल काठमाडौंमा जारी नेपाल प्रिमियर लिगमा दुई सय रन पुरा गर्ने पहिलो खेलाडी बने ।
राष्ट्रिय क्रिकेट टोलीका कप्तानसमेत रहेका पौडेलले एनपिएलको पाँचौं खेलमा दुई सय रन पूरा गरे ।
व्यक्तिगत रूपमा रोहितको प्रदर्शन सानदार रहे पनि टोलीको प्रदर्शन भने राम्रो छैन । यो कुरा रोहित स्वयम स्वीकार्छन् ।
‘मेरो लागि समग्र एनपिएल नै रोमाञ्चक छ, टोलीको लागि त्यति राम्रो थिएन आजसम्म,’ उनले भने, ‘टिमले जित्दा र आफूले रन हान्दा एकदमै खुसी लाग्छ ।’
उत्कृष्ट लयमा रहेका पौडेलले पाँच खेलमा दुई सय ६२ रन जोडेका छन् ।
मंगलबार भएको चितवन राइनोसविरुद्धको खेलमा उनले अर्धशतक प्रहार गरेका थिए ।
टिम एक रनमै दुई विकेट गुमाएको अवस्थामा ब्याटिङमा आएका रोहितले इनिङ मात्र सम्हालेनन् ५७ बलमा आक्रामक ८० रन प्रहार गरे ।
रोहितको पाँच छक्का र ६ चौका प्रहार गरेका थिए ।
त्यतिमात्र नभएर चितवनसँगको खेलमा रोहितले १७ रन खर्चिएर चार विकेट लिए ।
रोहितको सानदार ब्याटिङ र बलिङको मद्दतमा लुम्बिनीले चितवनलाई ३३ रनको जित हात पार्यो ।
प्रतियोगितामा पाँचौं खेल खेलेको लुम्बिनीको यो पहिलो जित हो । ऊ अहिले अंकतालिकाको पुछारमा छ ।
टिमले राम्रो प्रदर्शन गर्न नसके पनि रोहितको व्यक्तिगत प्रदर्शन भने हरेक खेलमा सानदार छ ।
रोहितले पहिलो खेलमा विराटनगर किंग्सविरुद्ध ४६ रन प्रहार गरेका थिए । दोस्रो खेलमा पोखरा एभेन्जर्सविरुद्ध भने उनले शतक बनाउनबाट पाँच रनले चुके ।
पोखरासँगको खेलमा ९५ रन बनाएका रोहितले तेस्रो खेलमा सुदूरपश्चिमविरुद्ध ५ रन तथा चौथो खेलमा जनकपुर बोल्टसविरुद्ध ३५ रन जोडेका थिए ।
प्रतियोगितामा रोहितले सात विकेट लिएका छन् । प्रतियोगितामा उनको टिम लुम्बिनीले भने राम्रो प्रदर्शन गर्न सकेको छैन ।
पहिलो खेलमा विराटनगरसँग २ विकेटको हार आत्मसात् गरेको लुम्बिनीले पोखरासँग १० विकेटको पराजय बेहोरेको थियो ।
सुदूरपश्चिमसँग ४५ रनले हारेको लुम्बिनीले जनकपुरसँग १ रनको झिनो हार खेपेको थियो । पाँचौं खेलमा भने लुम्बिनीले जित हात पार्यो ।
अब, उसले बुधबार दिउँसो काठमाडौं र शुक्रबार कर्णालीसँग खेल्ने छ ।
