विराटनगर । नेपालमा भारतीय र विदेशी टेलिभिजन च्यानलहरूको प्रसारण पुनः बन्द भएको छ ।
करिब ७० वटा भारतीय तथा विदेशी च्यानल बन्द भएको नेपाल केबल टेलिभिजन व्यवसायी महासंघका अध्यक्ष ध्रुव शर्माले जानकारी दिए ।
झण्डै डेढ वर्षअघि सञ्चार मन्त्रालयले विदेशी च्यानलको प्रसारणमा आलार्काटा प्रणाली लागू गर्ने मन्त्रीस्तरीय निर्णय गरेको थियो ।
तर इन्टरनेट प्रदायक कम्पनीहरूको असहयोगका कारण सो प्रणाली कार्यान्वयनमा समस्या भएको उनको भनाइ छ ।
उनले इन्टरनेटको पहुँच बढेसँगै टेलिभिजन हेर्ने जनसङ्ख्यामा बिस्तारै कमी आउन थालेको भन्दै विदेशी च्यानलले पनि मनपरी पैसा उठाउने गरेको बताए ।
उनका अनुसार १५ महिनाको पैसा नपाएका कारण विदेशी च्यानलहरूले नेपालमा प्रसारण बन्द गरेका हुन् ।
