विराटनगर । आइसिसी टी– २० विश्वकप अन्तर्गत समूह चरणको अन्तिम दुई खेल खेल्न नेपाली टोली बिहीबार सेन्ट भिन्सेन्ट पुगेको छ ।
यसअघि बुधबार अमेरिकाको फ्लोरिडाबाट सेन्ट भिन्सेन्ट जानका लागि तय भएको नेपाली टोलीको यात्रा खराब मौसमका कारण रोकिएको थियो ।
बुधबार लगातार पानी परेका कारण हवाई उडान रद्द भएकोले नेपाली टोली बिहीबार दिउँसो वेस्ट इन्डिजको सेन्ट भिन्सेन्ट पुगेको हो ।
बिहीबार सेन्ट भिन्सेन्ट पुगेको नेपाली क्रिकेट टोलीले स्पिनर सन्दीप लामिछानेसहित अभ्यास गरेको छ ।
सन्दीप लामिछाने एक साताअघि नै विश्वकप कप खेल्न वेस्ट इन्डिज पुगेका हुन् ।
अमेरिकाले दुई पटकसम्म भिसा दिन अस्वीकार गरेपछि क्यानडा हुँदै वेस्ट इन्डिज पुगेका सन्दीपले सेन्ट भिन्सेन्टमा दक्षिण अफिका र बंगलादेशसँग समूह चरणको खेल खेल्नेछन् ।
उनको आगमनले टोलीको आत्मविश्वास थप बढेको नेपाली टोलीका प्रशिक्षक मोन्टी देसाईले बताएका छन् ।
सन्दीप टोलीका लागि महत्त्वपूर्ण खेलाडी भएको र उनको आगमनले नेपालको लेग स्पिनर आक्रामक बन्ने प्रशिक्षक मोन्टीको भनाई छ ।
यसअघि नै वेस्टइन्डिज पुगेर तयारी गरेका सन्दीपले बिहीबार टोलीसँगै सामूहिक अभ्यास थालेका हुन् ।
समूह ‘डी’ अन्तर्गत नेपाल अमेरिकामा दुई खेल सकेर बाँकी दुई खेल खेल्न सेन्ट भिन्सेन्ट गएको हो ।
नेपाल समूहको पहिलो खेलमा नेदरल्यान्ड्ससँग पराजित भएको थियो । डालासमा भएको पहिलो खेलमा नेपाल नेदरल्यान्डससँग ६ विकेटले पराजित भएको थियो ।
यस्तै फ्रलोरिडामा बुधवारका लागि तय भएको श्रीलङ्काविरुद्धको दोस्रो खेल भारी वर्षाका कारण रद्द भएको थियो ।
नेपालले सेन्ट भिन्सेन्टमा शनिबार दक्षिण अफ्रिकासँग तेस्रो र साेमबार बंगलादेशसँग अन्तिम खेल खेल्नेछ ।
नेपाललाई समूह चरण पार गरेर सुपर आठमा स्थान बनाउन अबका दुई खेल जित्नै पर्ने बाध्यता छ ।
अहिले समूहमा लगातार तीन जित निकालेको दक्षिण अफ्रिका ६ अंक जोड्दै शीर्षस्थानमा छ । दक्षिण अफ्रिकाले सुपर आठमा स्थान बनाइसकेको छ ।
यस्तै, दोस्रो स्थानमा रहेको बङ्गलादेशको चार अंक छ ।
बिहीबार भएको खेलमा बंगलादेशले नेलरल्यान्ड्सलाई २५ रनले हराएको थियो ।
सेन्ट भिन्सेन्टको किङसटाउन मैदानमा भएको खेलमा जितका लागि बंगलादेशले दिएको एक सय ६० रनको लक्ष्य पछ्याएको नेदरल्यान्ड्स निर्धारित २० ओभरमा आठ विकेटको क्षतिमा एक सय ३४ रनमा समेटिएको थियो ।
यसअघि, पहिले ब्याटिङ गरेको बङ्गलादेशले निर्धारित २० ओभरमा पाँच विकेटको क्षतिमा एक सय ५९ रन बनाएको थियो । हारे पनि तीन खेलबाट दुई अंक बनाएको नेदरल्यान्डस तेसो स्थानमा छ ।
दुई खेलबाट एक अंक बनाएको नेपाल चौथो र तीन खेलबाट एक अंक बनाएको श्रीलंका अन्तिममा छ ।
श्रीलंका विश्वकपबाट बाहिरी सकेको छ ।
