विराटनगर । विराटनगरको आरोहण गुरुकुल सुशीला कोइराला नाटक घरमा नाटक ‘चौथो अध्याय’ मञ्चन भइरहेको छ ।
गुरुकुलकै रविन चिमरिया र दीक्षा चौधरीले निर्देशन गरेको उक्त नाटक गत शुक्रबारबाट मञ्चन गर्न थालिएको थियो ।
अब, शुक्रबार अर्थात् भोलि अन्तिम शो मञ्चन हुने नाटकका कलाकार भरत कार्कीले जानकारी दिए । कार्की यस नाटकको परिकल्पनाकारसमेत हुन् ।
नाटक हरेक दिन बेलुका ५ः३० बजे मञ्चन भइरहेको छ ।
नाटक जीवनको उत्तरार्धमा देखापर्न सक्ने मनोसामाजिक अवस्थामा केन्द्रित छ ।
एउटी नारीले सामाजिक रुपमा भोग्नुपर्ने मानसिक तथा शारीरिक पिडालाई प्रायोगिक एवम् काव्यिक हिसाबले नाटकको माध्यमबाट देखाउने प्रयास गरिएको छ ।
त्यसबाहेक मृत्युनजिक पुगेर त्यसलाई जित्दै परिवर्तनका लागि संघर्ष गरेर पनि महिलाले जिउन सक्छन् भन्ने सन्देश नाटकले दिन खोजेको छ ।
अनेक विभेदको पेरिफेरिबाट माथि उठ्दै समाज परिवर्तनका लागि संघर्ष गरेर पनि महिलाहरू बाँच्न सक्छन् भन्ने सन्देश दिन खोजिएको कलाकार कार्कीको भनाइ छ ।
नाट्य साहित्यको अध्ययन तथा प्रयोगात्मक प्रक्रियामा अत्यन्तै आवश्यक रहने सुधारात्मक पद्धति ‘इम्प्रुभाइजेसन’ र पात्र तथा परिवेश कल्पना ‘इम्याजिनेसन’ बाट नाटकको संयोजन गरिएको छ ।
यो नाटक मनोसामाजिक खोज तथा अध्ययनको एउटा प्रायोगिक अभ्यास रहेको नाटककी निर्देशक दीक्षा चौधरीले जानकारी दिइन् ।
नाटकमा लक्ष्मीप्रसाद देवकोटा, पारिजात, चार्ल्स बुकोवस्की र विप्लव प्रतीकका कविताहरूलाई समेत प्रयोग गरिएको छ ।
नाटकले दर्शन, विचारधारा र व्यवहारिकताबीचको जीवनको विरोधाभाषपूर्ण संघर्षलाई समेत इंगित गरेर देखाउन खोजिएको छ ।
चौथो अध्यायमा भरत कार्कीका अलाबा दीक्षा चौधरी, प्रदीप दाहाल, रविन चिमरीया, यसश्वी चौधरीलगायतको अभिनय छ ।
