विराटनगर । झापाको भद्रपुर नगरपालिका-९ चन्द्रगढीकी नरिका राईले नेपाली बक्सिङका लिजेन्ड पूर्वअन्तर्राष्ट्रिय खेलाडी ओम मास्केलाई प्रत्यक्ष भेट गर्न पाएकी थिइनन् ।
५७ वर्षीय बक्सर मास्केको नाम उनले सुनेकी मात्र थिइन् । १९ वर्षीया नरिका आफैं पनि बक्सिङ खेलाडी हुन् ।
मोफसलमा रहेर बक्सिङमा करिअर देखिरहेकी नरिकाले पहिलोपटक बिर्तामोडमा श्रीलंकाको कोलम्बोमा सम्पन्न पाँचौं दक्षिण एसियाली खेलकुदमा कास्य पदकधारी मास्केलाई भेट्दा उत्साहित भएकी थिइन् ।
खेलकुद विकास बोर्ड कोशी प्रदेशको आयोजन र नेपाल ओलम्पियन्स एसोसिएसनको संयोजनमा भएको ओलम्पियन्स रियुनियन (पुनर्मिलन) कार्यक्रममा पहिलोपटक मुख्य प्रशिक्षक मास्केलाई नरिकाले भेटेकी हुन् ।
शुक्रबार मध्याह्न चर्को घाममा झापाको बिर्तामोडस्थित मुक्ति चौकबाट सम्मान कार्यक्रमसम्म पुग्ने क्रममा भएको भेटले नरिकाको बक्सिङ जीवनलाई नयाँ मोड दिने भएको छ ।
काठमाडौंमा हुने बन्द प्रशिक्षणका लागि नरिकालाई राख्ने जमर्को मास्केले गर्ने भएका छन् ।
४ दशक लामो बक्सिङ अरियरपछि हाल राष्ट्रिय खेलकुद परिषद्को मुख्य प्रशिक्षक रहेका मास्केले भने, ‘नरिकाको केही खेल हेरेको छ । उनमा पोटेन्सियल देखेको छु । युवा छिन् । धेरै सम्भावना छ । त्यसैले पनि मैले उनलाई काठमाडौंमा राखेर प्रशिक्षण गराउने तयारी गरेको छु ।’
खेलकुद पर्यटनका लागि आयोजित ओलम्पियन्स पुनर्मिलन कार्यक्रममा मास्केले नयाँ खेलाडीसमेत पहिचान गर्न सफल भएको बताँउछन् ।
उनले भने, ‘युवा पुस्तामा बक्सिङप्रति आकर्षण बढ्दै गएको छ । यस्तो अवस्थामा हामीले पनि साथ दिन आवश्यक छ । विदेशमा समेत सहभागिता बढ्दै गएको छ ।
यस विषयमा नरिका समेत उत्साहित भएकी थिइन् । उनले भनिन्, ‘बक्सिङ खेल्नका लागि काठमाडौं जान तयार छु । राष्ट्रको लागि खेल्ने मेरो धोको हो । सायद ओम गुरुबाट पूरा होला । मेहनत र परिश्रम गर्नेछु ।’
नरिकाको आमा जुडो र बुबा फुटबलसँग आबद्ध छन् । त्रिशा जबेगुबाट बक्सिङ खेलमा प्रभावित भएको बताएकी नरिकालाई झापामा डम्मर लिम्बूले प्रशिक्षण दिँदै आएका छन् ।
उनले भनिन्, ‘मलाई बक्सिङमा आकर्षण गराएको त्रिशा दिदीको खेलले हो। उहाँको खेल र टोलमा दाइहरूले खेल्नु भएको देखेर प्रभावित भएकी हुँ ।’
बक्सिङका प्रशिक्षक र ओलम्पिक खेल्ने सबै खेलाडीलाई एकैपटक चिन्ने अवसर नपाएको अवस्थामा पुनर्मिलन भ्रमणले सहजता प्रदान गरेको उनको भनाइ छ ।
नरिका भन्छिन्, ‘यसप्रकारको कार्यक्रमले सबै पुरानो खेलाडीलाई चिनाएको छ । धेरै कुरा सिक्न पाएका छौं । यसक्रममा ओम गुरुसँग भेट भएको हो । उहाँसँगको भेटले थप ऊर्जा मिलेको छ । उहाँले आगामी प्रशिक्षणका लागि हेरिदिनु हुने अपेक्षा गरेको छु ।’
२०७६ सालबाट बक्सिङ खेल्न सुरु गरेकी नरिकाले सन् २०२१ मा दुवईमा सम्पन्न एचबीसी युथ बक्सिङमा तेस्रो स्थान हासिल गरेकी थिइन् ।
त्यसपछि गतवर्ष चैत्रमा भरतपुरमा आयोजित प्रथम अन्तरप्रदेश खेलकुदमा समेत कोशी प्रदेशबाट उनले स्वर्ण पदक हात पारेकीछिन् ।
खेलाडीहरूको विदेशीने क्रम बढ्दो भएपनि नरिका विभागिय टोलीमा अटाउन सकिने सम्भावना खोजिरहेकी छिन् ।
पछिल्लो समय बक्सिङका खेलाडीको स्तर बढ्दै गएको मुख्य प्रशिक्षक मास्केले बताउँछन् ।
उनले भने, ‘सुरुका दिनमा खेलाडीले रिङमा ३ राउण्ड खेल्न सक्छन् कि सक्दैनन् भन्ने हुन्थ्यो । तर अहिले खेल र खेलाडीमा सुधार छ । हाम्रा खेलाडी समेत पाँच राउण्डसम्म खेल्न योग्य छन् । तर खेलाडीलाई समयमै चिनेर प्रशिक्षण दिन सक्नुपर्छ । हामीपनि राम्रो खेलाडीको खोजीमा रहन्छौं ।’
बेलायत, मलेसिया, सिंगापुर, अस्ट्रियालगायतबाट पाँच जना विदेशीसहित ६० जना नेपाली ओलम्पियन्स र २५ जना प्रदेशका चर्चित खेलाडीलाई पुनर्मिलन भेलाले एकै स्थानमा उभ्याएको हो ।
सन् १९६४ देखि हालसम्मका ओलम्पियन खेलाडीहरूलाई पुनर्मिलन गराउँदै खेल र खेलाडीका माध्यमबाट पर्यटन प्रवर्द्धन गर्ने उद्देश्य लिएर चार दिने रियुनियन कार्यक्रम भएको हो ।
कोशी प्रदेशका सुनसरी, मोरङ, झापा र इलाम गरी चार जिल्लामा ओलम्पियन्स र प्रदेशका सेलिब्रेटी खेलाडीलाई विशेष स्वागत्–सम्मान गरिएको थियो ।
