विराटनगर । विद्युतीय सवारीसाधनप्रति आकर्षण बढ्दै जाँदा अब नेपालमै सबै किसिमका चारपांग्रे सवारीसाधन उत्पादन हुने भएको छ ।
एक वर्षभित्र सबै किसिमका सवारीसाधन उत्पादन गर्ने उद्देश्यका आज नेपालको कोशी एन के मोटर्स प्रा.लि. र चीनको स्यामन गोल्डेन ड्रागन अटोबडी कम्पनी लिमिटेडबीच सम्झौता भएको हो ।
चीनको फुजियन प्रान्तमा रहेको उक्त अटोबडी कम्पनीसँग स्थानीय ज्योतिष शास्त्रअनुसार बिहान १० बजेर १८ मिनेटमा सम्झौता पत्रमा दिपक्षीय हस्ताक्षर भएको हो ।
सम्झौतामा कोशी एन के मोटर्सका अध्यक्ष टीकाराम पुरी र स्यामनका तर्फबाट प्रबन्ध निर्देशक (एमडी) ले हस्ताक्षर गरे ।
उक्त अवसरमा कोशी एनके का एमडी टिआर ढकालको समेत उपस्थिति थियो ।
सम्झौता भएसँगै अब नेपालमा नै चिनियाँ तथा कोरियन प्रविधिमा आधारित चारपांग्रे विद्युतीय गाडी उत्पादन हुने भएको हो ।
नेपालमा पहिलोपटक मोरङको बूढीगंगामा १५ बिघा क्षेत्रफलमा सञ्चालनको तयारी गरिएको यस कम्पनीमा सुरुआती चरणमा ३ अर्ब रुपैयाँको लागत रहने अध्यक्ष टीकाराम पुरीले बताए ।
उनका अनुसार एक वर्षभित्र सबै चारपांग्रे सवारीसाधन उत्पादन गर्ने छ ।
कम्पनीले नेपाली परिवेश र आवश्यकताअनुसार प्रत्येक महिना सात सय ५० गाडी उत्पादन गर्ने छ ।
