विराटनगर । बलिवुडका चर्चित अभिनेता सलमान खानको घरबाहिर गोली चलेको छ ।
आइतबार मुम्बईको बान्द्रास्थित गैलेक्सी अपार्टमेन्ट अगाडि गोली प्रहार भएको भारतीय मिडियाहरूले उल्लेख गरेका छन् ।
ग्यालेक्सी अपार्टमेन्टअगाडि दुई मोटरसाइकल सवारले चार राउन्ड फायर गरेपछि घरको सुरक्षा बढाइएको बताइएको छ ।
गोली चल्दा सलमान आफ्नै घरमा थिए । सलमानलाई लरेन्स बिश्नोई–गोल्डी ब्रार गिरोहबाट ज्यान मार्ने धम्की आएको थियो ।
घटनाको खबर पाएलगत्तै मुम्बई पुलिस, अपराध शाखा र फोरेन्सिक विशेषज्ञहरूको टोली घटनास्थलमा पुगेको थियो ।
सलमानको घरबाहिर पनि सुरक्षा बढाइएको छ । आक्रमणकारीहरूको पहिचान गर्न नजिकैको सिसिटिभी फुटेज पनि जाँच गरिँदै छ र मानिसहरूसँग सोधपुछ पनि भइरहेको छ ।
लरेन्स बिश्नोईले मार्च २०२३ मा सलमानलाई धम्की दिएका थिए । बिश्नोईको धम्कीपछि सलमान खानको सुरक्षा बढाइएको थियो । उनले महाराष्ट्र सरकारबाट वाई प्लस श्रेणीको सुरक्षा पाएका छन् ।
यसअघि सलमानसँग महाराष्ट्र प्रहरीका कर्मचारी बस्ने गर्दथे तर धम्की आएपछि उनलाई वाई प्लस श्रेणीको सुरक्षा दिइएको छ ।
यो सुरक्षा घेरामा ११ जना सैनिक सधैं सलमानसँग रहन्छन्, जसमा एक वा दुई कमाण्डो र दुई पिएसओ पनि हुन्छन् ।
सलमानको गाडीअगाडि र पछाडि एस्कर्ट गर्न सधैं दुईवटा गाडी हुन्छन् । यससँगै सलमानको कार पनि पूर्ण रूपमा बुलेटप्रुफ रहेको छ ।
