विराटनगर । सत्मार्गमा हिँड्ने एक लोकप्रिय राजा देवताहरूद्वारा नै तिनको सत्यको कठोरभन्दा कठोर परिक्षण र सुखद् अन्त्य, ‘सत्य हरिश्चन्द्र नाटकको समग्र कथा यही हो ।
यहीँ कथामा नै खासगरी भारतमा कैयौं नाटक मञ्चन गरिएको छ । भारतेन्दु हरिश्चन्द्रले लेखेको उक्त नाटकमा आधारित भएर भारतमा पहिलो फूल लेन्थ फिचर फिल्म बन्यो ।
नेपाली भाषाको पहिलो चलचित्र पनि सत्य हरिश्चन्द्र नै हो । उही कथावस्तुमा आधारित नाटक विराटनगरमा मञ्चन शुरु भएको छ ।
विराटनगरको एकमात्र नाटकवर आरोहण गुरुकुलको सुशीला कोइराला नाटकरमा शुक्रबारदेखि ‘सत्य हरिश्चन्द्र को प्रदर्शन गुरु गरिएको हो ।
करिब एक सय ५० वर्षअघि आधुनिक हिन्दी साहित्यका पिता भनेर चिनिने भारतेन्दु हरिश्चन्द्रले लेखेका उक्त नाटक करिब ५० वर्षअघि नै नेपालीमा अनुवाद गरिएको थियो ।
शिक्षण पेसा र साहित्यमा आवद्ध रंगेलीका केदार सत्यालले वि.सं. २०३३ सालमै नेपालीमा अनुवाद गरेको उक्त नाटकले मञ्चमा स्थान पाएको छ ।
सूर्यकुलका राजा हरिश्चन्द्रको सत्यनिष्ठाको कथामा आधारित भएर तयार पारिएको यस नाटकले सत्यपथमा जस्तोसुकै कष्ट भएता पनि त्यसको अन्त्य सुखद हुने सन्देश दिएको छ ।
आधुनिक नाटकहरूभन्दा फरक यस शास्त्रीय नाटकले नैतिक जीवनमा सकारात्मक प्रभाव पार्ने विश्वाससहित नाटक मञ्चन गरिएको निर्देशक दिपेश भण्डारीले बताए ।
‘करिब ५० वर्षअघि अनुवाद भएर थन्किएको अवस्थामा फेला परेको यो नाटक मञ्चमा प्रस्तुत गर्ने जमर्को गरेका हौं’, निर्देशक भण्डारीले भने ।
१ घण्टा ४५ मिनेट अवधिको यो नाटकमा राजा हरिश्चन्द्र रानी शैव्या, भगवान ईन्द्र, नारदमुनी विश्वामित्र लगायत पात्रहरू देखिन्छन् ।
केही समय अडिसन गरी कलाकार छनोट गरेर रिहर्सल थालेको गुरुकुलको यस नाटकमा प्रदीप दाहाल, दीक्षा मिश्र, सविन भट्टराई, रविन चिमरिया, आयुष प्रसाद कोइराला, विकास अधिकारी, निशान राई, जितेन्द्र रजक, पंकज साह, मेलिना कार्की, एलिजा ठाकुर, विवश ढकाल, रागन मानन्धर, दिक्षा चौधरी, मनिषकुमार ठाकुर लगायतको अभिनय छ ।
भरत कार्कीको प्रकाश परिकल्पना सविन भट्टराईको मञ्च परिकल्पना तथा सह निर्देशनमा तयार यस नाटक चैतको २३ देखि ३० गतेसम्म साँझ ५:१५ बजे मञ्चन भइरहेको गुरुकुलका अध्यक भैरव क्षेत्रीले जानकारी दिए ।
